Ótken jyly Qazaqstanda tutynýshylar shyǵyny 1 mlrd teńgeden asqan

ALMATY. QazAqparat - Búgin Almatyda ulttyq tutynýshylar lıgasynyń prezıdenti Svetlana Romanovskaıa BAQ ókilderimen kezdesý ótkizip, ótken jyldy qorytyndylady, dep habarlaıdy QazAqparat tilshisi.

Kezdesý barysynda Svetlana Romanovskaıa byltyr Tutynýshylardyń ulttyq lıgasyna 6150 azamat keńes alýǵa júginip, ótinish bergen azamattardyń jalpy shyǵyn somasy 1 187 360 400 teńgeni quraǵanyn málimdedi. Onyń arasynda medıatsııa tártibimen 99% is sheshilse, sot tártibinde 9 is qaralǵan.

«Shaǵym túsirip, sapasyz taýarlar men qyzmet kórsetkeni úshin narazylyq bildiretinder sany kúnnen kúnge artyp keledi, sebebi qazir óz quqyǵyn qorǵaǵysy keletinder az emes. Byltyr bizdiń uıymǵa ótinish bergen azamattardyń shaǵymyn qarap, 1 mıllıard teńgeden astam shyǵyndaryn qaıtaryp berýge kómektestik. Tutynýshylardyń 40% tehnıkaǵa shaǵym bildiredi, odan bólek azyq-túlik ónimderine, medıtsınalyq jáne kommýnaldyq qyzmetterge kóńili tolmaıtyndar sany da jeterlik», - dedi «Tutynýshylardyń Ulttyq lıgasy» AQB prezıdenti Svetlana Romanovskaıa.

Onyń aıtýynsha, uıym tutynýshylarǵa quqyqtyq jáne konsýltatsııalyq kómek kórsetedi, sot, sotqa deıingi jáne medıtatıvtik tártippen qorǵaıdy, sondaı-aq «Tutynýshylar quqyqtaryn qorǵaý týraly» QR Zańynyń 41-babyna sáıkes qyzmettiń barlyq spektrin júzege asyrady. Keńes berý UTL keńsesinde, potrebitel.kz saıtynda jáne lıganyń barlyq áleýmettik jelileri arqyly júrgiziledi.

Elaman Turysbekov