Ótken jyly Qazaqstanda 138 mln túp aǵash otyrǵyzyldy

NUR-SULTAN. QazAqparat – Ótken jyly Qazaqstanda 66 myń gektar alqapqa 138 mln túp aǵash otyrǵyzyldy. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

Mınıstrdiń aıtýynsha, bıoalýantúrlilikti saqtaý maqsatynda «Jasyl Qazaqstan» ulttyq jobasyna 3 kórsetkish pen 8 is-shara qabyldanǵan. Ulytaý taý-dala massıviniń ekojúıesin qalpyna keltirip, saqtaý úshin Memleket basshysynyń tapsyrmasymen aýdany 58,9 myń gektar «Ulytaý» ulttyq parki quryldy.

«Memleket basshysynyń 2 mıllıard aǵash otyrǵyzý tapsyrmasymen oblys ákimdikteri ormandy qalpyna keltirý jónindegi keshendi josparlaryn bekitti, ınteraktıvti karta daıyndalyp, kerekti tehnıka men jabdyq quraldary satyp alyndy. Ótken jyly josparlanǵan 44,3 myń ga ornyna 66 myń gektar alqapqa 138 mln aǵash otyrǵyzyldy. Bıyl kóktemdik otyrǵyzylymda josparlanǵan 66,9 myń gektardyń 39 myń gektaryna 106,4 mln aǵash otyrǵyzyldy. Orman daqyldarynyń negizgi jumys kólemin aıaqtaý kúz mezgiline josparlanǵan», - dedi S. Brekeshev Úkimettiń búgingi otyrysynda.

Sonymen birge Aral óńiriniń ekologııalyq jaǵdaıyn jaqsartý maqsatynda ótken jyly 100 myń ga sekseýil otyrǵyzylǵan jáne bıyl 250 myń gektar otyrǵyzý josparlanǵan. Osy jyldyń kókteminde 12 myń gektar sekseýil egilse, qalǵan 238 myń gektar alqapqa kúzde egiledi.

«Byltyr respýblıka boıynsha orman daqyldarynyń jersinýine ınventarızatsııa júrgizildi. Kúzgi ınventarızatsııa boıynsha orman daqyldarynyń jersinýi shamamen 72% kórsetken. Bıyl Aqtóbe jáne Batys Qazaqstan oblystarynda bekitilgen josparly jumystardy júrgizýge qarjy bólinbedi, bul Memleket basshysynyń tapsyrmasyn oryndaýǵa kedergi keltirýi múmkin. Osyǵan baılanysty, orman ıelerin materıaldyq-tehnıkalyq quralmen qamtý, ormandy qalpyna keltirý máselelerin sheshý maqsatynda atalǵan oblys ákimderinen jergilikti bıýdjetten qarajat bólý múmkindigin qarastyrýdy suraımyn», - dedi Ekologııa mınıstri.