Ótken jyly eńbek naryǵynda qandaı sharalar qabyldandy
Birinshiden, Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasy aıasynda jumyssyz adamdardy, onyń ishinde qysqartylǵan jumysshylardy qoldaý kórsetýge tartý jumystary júrgizildi. Bul turǵyda qysqa merzimde oqytý, kásipkerlik baǵytynda kómektesý, sýbsıdııalanatyn jumys oryndaryna baǵyttaý eskerildi. 2020 jyly baǵdarlamaǵa qatysatyndar quramyna 600 myńnan astam adam engizildi.
Ekinshiden, halyqty jumyspen qamtamasyz etý boıynsha daǵdarysqa qarsy qadamdardy júzege asyrý maqsatynda Jumyspen qamtýdyń 2020-2021 jyldarǵa arnalǵan jol kartasy iske asyrylyp jatyr. Jol kartasynyń maqsaty – jumyspen qamtý, jumyssyzdyqtyń ósýine jol bermeý, halyqtyń tabysyn qamtamasyz etý, sondaı-aq eldi mekenderdiń ınfraqurylymyn damytý úshin jaǵdaı jasaý.
Osy maqsatqa jetý úshin Jol kartasy aıasynda tıisti qyzmetter men nysandar boıynsha ınfraqurylymdyq jobalar iske asyryldy. Bul baǵytta bilim berý, densaýlyq saqtaý, mádenıet, sport jáne demalys, halyqqa qyzmet kórsetý, turǵyn úı-kommýnaldyq sharýashylyq, ınjenerlik-kóliktik ınfraqurylym nysandaryn salý men jóndeýden ótkizý, sondaı-aq eldi mekenderdi abattandyrý jumystary qamtyldy.
Osy arqyly atalǵan jobalardy júzege asyrý turǵysynda Jol kartasy boıynsha 237 myń jańa jumys orny quryldy. Munyń jartysynan astamy halyqty jumyspen qamtý ortalyqtarynyń múmkindikteri arqyly toltyryldy.
Úshinshiden, elimizdegi basqa da memlekettik baǵdarlamalar aıasynda jumysqa tartý baǵytynda tıisti is-sharalar uıymdastyryldy. Bıznestiń jol kartasy, ındýstrıaldy-ınnovatsııalyq damý, óńirlerdi jáne agroónerkásiptik keshendi damytý, Tsıfrly Qazaqstan, «Nurly jol», «Nurly jer», týrıstik salany damytý baǵyttarynda 546 myń jumys orny quryldy.
Osy arqyly, 2020 jyly jumyspen qamtýǵa qoldaý kórsetý is-sharalarymen 1 mıllıonnan astam adam qamtyldy.
Aıta keteıik, QR Eńbek jáne halyqty áleýmettik qorǵaý mınıstri Birjan Nurymbetov 2020 atqarǵan jumystaryna baılanysty esebinde 2020 jyl COVID-19 pandemııasyna baılanysty búkil álem úshin qıyn synaq bolǵandyǵyn aıtty.
«Pandemııamen jáne onyń saldarymen kúres Úkimetten aýrýdyń ósýin toqtatý jáne halyq pen el ekonomıkasy úshin aýqymdy teris saldarlardyń aldyn alý úshin buryn-sońdy bolmaǵan sharalar qabyldaýdy talap etti. Memleket basshysynyń tapsyrmasy boıynsha Memlekettik áleýmettik saqtandyrý qorynyń qarajaty esebinen kiristerinen aıyrylǵan adamdarǵa eń tómengi jalaqy (42 500 teńge) mólsherinde aı saıynǵy tólemderdi berý tetigi jedel túrde ázirlenip, iske qosyldy. Tótenshe jaǵdaı jáne karantındik shekteý is-sharalary kezeńinde barlyǵy 4,6 mln adam jalpy somasy 476,1 mlrd teńgege osyndaı tólemder aldy. Sondaı-aq, tótenshe jaǵdaı jáne karantın kezeńinde jalpy somasy 25 mlrd-tan astam teńgege 1,1 mln-nan astam adam azyq-túlik-turmystyq jıyntyqtar satyp alýǵa tólemder túrinde qosymsha qoldaý aldy»,-dedi mınıstr.
Sondaı-aq ol sózinde elde halyqty jumyspen qamtý boıynsha úlken jumys júrgizilgendigin atap ótti.
«Daǵdarysqa qarsy shara retinde jumyspen qamtýdyń jol kartasy ázirlenip, tabysty iske asyrylýda. Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyn jáne basqa da memlekettik baǵdarlamalardy iske asyrýdyń arqasynda 1,2 mln jumys ornyn qurý jáne saqtap qalý jáne jumyssyzdyqtyń ósýine jol bermeý múmkin boldy. Bul rette, qıyn jaǵdaıǵa qaramastan, memlekettiń barlyq áleýmettik mindettemelerin oryndaý qamtamasyz etildi»,-dedi Birjan Nurymbetov.