Ótken jyly elimizde 1 237 250 teńgege barabar 391 jalǵan aqsha anyqtaldy

ASTANA. QazAqparat - Qazaqstan Ulttyq banki men ekinshi deńgeıli bankter 2022 jyly 1 237 250 teńgege barabar 391 jalǵan aqsha belgisin anyqtady, dep habarlaıdy QazAqparat Ulttyq banktiń baspasóz qyzmetine silteme jasap.

Baspasóz qyzmetiniń málimetterine qaraǵanda, anyqtalǵan aqshanyń 386-sy – banknota, 5-ýi – moneta (1-sýrette).

Bul kórsetkish 2021 jylmen salystyrǵanda 24,7%-ǵa az (1 577 400 teńgege barabar 519 jalǵan aqsha belgisi).

Jalǵan aqsha belgileriniń nomınaldaryna jasalǵan taldaý jumystarynan myna banknotalardyń qoldan jıi jasalatyny belgili boldy: 2000 teńge – 238 dana (jalpy anyqtalǵan jalǵan aqsha sanynyń 60%-yn quraıdy), 10 000 teńge – 55 dana (14%), 500 teńge – 50 dana (12,8%) (2-sýret).

Qoldan jasalǵan aqshalardyń kóp mólsheri Almatyda anyqtaldy – 255 dana nemese jalpy sanynyń 65,2%-y. Qalǵan óńirlerde 136 dana nemese jalpy sanynyń 34,8%-y.

Qazaqstanda jalǵan banknotalar negizinen kompıýterlik tehnıkany, qarapaıym túrli-tústi prınter men ofsettik qaǵazdardy qoldana otyryp jasalǵan. Qoldan aqsha jasaýshylar vızýaldy qorǵanysh elementterin meıilinshe uqsatyp jasaýǵa tyrysady .

Jalǵan aqshany túpnusqadan qalaı ajyratýǵa bolatyny týraly aqparatpen QUB-tyń resmı saıtynda nemese QUB-tyń YouTube-tegi resmı akkaýntynda tanysýǵa bolady.