Ótken jyly dala órtteriniń 27 paıyzy eriktilerdiń kúshimen sóndirildi

ASTANA. QazAqparat – Ótken jyly dala órtteriniń 27 paıyzy erikti órt sóndirý qurylymdarynyń kúshimen sóndirildi. Bul týraly Úkimet otyrysynda Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi.

«TJM bólimsheleri joq jerde erikti órt sóndirý qurylymdaryna jáne aýyldyq eldi mekenderdegi órt sóndirý beketterine bólek toqtalǵym keledi. Búgingi tańda ákimdikter tórt myńnan astam erikti órtke qarsy qurylymyn qurdy. Ótken jyly eriktiler memlekettik órtke qarsy qyzmettiń kúsh-quraldaryn tartpaı-aq, dala órtteriniń 27 paıyzyn sóndirdi. Sondaı-aq ákimdikter 591 órt sóndirý beketin qurdy. Olar jalpy sany 2 mln adamnan asatyn eki myńǵa jýyq eldi mekendi órtten qorǵaıdy. Bolashaqta bul jumysty jalǵastyrý qajet», - dedi Ibragım Kúlshimanov.

Onyń atap ótýinshe, mınıstrlik tarapynan atalǵan qurylymdardy tehnıkalyq nyǵaıtý úshin jergilikti atqarýshy organdardyń qaramaǵyna 575 jaramdy órt sóndirý avtotsısternasy berildi.

«Búgingi tańda órt sóndirý beketterinde 768 túrli tehnıka bar», - dedi ol.