Ótken jyly basqa elder Qazaqstanǵa 56 qylmyskerdi qaıtardy – Bas prokýratýra

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasy men Soltústik Makedonııa Respýblıkasy arasyndaǵy adamdardy ustap berý týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.

2019 jyly Soltústik Makedonııamen sharttardyń tolyq paketine qol qoıyldy.

«Olardyń biri - Qazaqstan men Soltústik Makedonııa arasyndaǵy Adamdardy ustap berý týraly shart. Bul Sharttyń negizgi maqsaty – izdeýde júrgen adamdardy qylmystyq jaýapqa tartý úshin ekstradıtsııalaý máselesin retteý. Shartta ustap berýdiń kelesi negizderine toqtalsaq, birinshiden, eki eldiń de zańyna sáıkes áreket qylmys bolyp sanalýy tıis. Ekinshiden, qylmystyq jaýapqa tartylatyn adam keminde 1 jylǵa bas bostandyǵynan aıyrýǵa jazalanýy qajet. Úshinshiden, sot úkimin oryndaý úshin izdeýdegi adamnyń ótelmegen jaza merzimi keminde 6 aı bolýy kerek», - dedi QR Bas prokýrorynyń birinshi orynbasary Berik Asylov.

Endi, adam ustap berilmeıtin negizderge toqtasaq:

- eger suratýshy Taraptyń zańnamasy boıynsha qylmys úshin ólim jazasy kózdelse;

- izdeýdegi adam aqtalǵan bolsa nemese oǵan qatysty qylmystyq qýdalaý toqtatylsa;

- eskirý merzimi ótip ketse;

- izdeýdegi adam sol eldiń azamaty bolsa;

- suratylǵan adam áskerı qylmys jasaǵan bolsa;

- nemese ol násili, dini, saıası kózqarasy úshin aıyptalýy ne sottalýy múmkin bolsa.

«Qazirgi ýaqytta Soltústik Makedonııa men Qazaqstanda jasyrynyp júrgen adamdar joq. Búgingi kúni Qazaqstan 20 memleketpen ustap berý týraly sharttar jasady. Bolashaqta Malaızııa, Domınıkan, Perý, Argentınamen osyndaı sharttarǵa qol qoııamyz. Ótken jyly basqa memleketterge, elimizde jasyrynyp júrgen 64 shetel azamatyn ustap berdik. Al, bizge basqa elder 56 qylmyskerdi qaıtardy», - dedi B. Asylov.