Ótken jyly adam urlyǵyna qatysty 60 qylmystyq is qozǵaldy - Qýanysh Sultanov

ASTANA. QazAqparat - QR Prezıdenti janyndaǵy Adam quqyqtary jónindegi komıssııanyń tóraǵasy Qýanysh Sultanov adam saýdasy, eńbek mıgranttary jáne adamgershilik tárbıesine qatysty máseleler jaıynda baıandady, dep habarlaıdy QazAqparat.

Atap aıtqanda, búgin QR Syrtqy ister mınıstrliginde Adam quqyqtary jónindegi komıssııanyń «Qazaqstandaǵy eńbekshi-mıgranttardyń jáne adam saýdasy qurbandarynyń quqyqtaryn qorǵaýdyń ózekti problemalary» atty taldaý baıandamasynyń tusaýkeseri ótti.

Qýanysh Sultanovtyń sózine qaraǵanda, Qazaqstan aýmaǵynda resmı túrde 60 myń eńbek mıgranttary tirkelgen, sonymen qatar zańsyz mıgranttardyń da sany az emes. Ótken jylda adam urlyǵyna qatysty 60-qa jýyq qylmystyq is qozǵalǵan.

«Jas analar ózderiniń balalaryn satýǵa qalaı barady? Osy tektes jaǵdaıǵa jol berilmeýi kerek. Eger de qyzdar ana bolýǵa nıettense, onda ol bala úshin jaýapkershilik bar ekenin umytpaýy tıis. Bul turǵyda qajetti tárbıelik jumystar qamtylǵan jón. Barlyq mektepte osyndaı sharalar eskerilgen, alaıda bul qadamdar jetkiliksiz bolyp turǵan sekildi. Sonymen qatar osyndaı jumystar otbasylarda da júrgizilýde, biraq ony taǵy da kúsheıtý qajet»,-dedi Komıssııa tóraǵasy.

Sultanovtyń aıtýynsha, qazirgi kezde Adam quqyqtary jónindegi komıssııa atalǵan baǵytta tıisti usynystardy daıarlap jatyr.

«Biz jeke tárbıemen, otbasy róli men árbir azamattyń jaýapkershiligin arttyrý máselesimen aınalysýymyz kerek. Alaıda bundaı problemalar barsha álemde bar. Ókinishke qaraı, soǵys oty jaıylǵan jerlerde adamgershilikke jat jaǵdaılar órship ketken jáne ýaqyt óte kele onyń barlyǵy basqa óńirlerge de taraıdy. Sondyqtan da bizdiń komıssııa barlyq ahýalǵa taldaý jasaýdy jón kórip, bizdiń zańgerler men sarapshylar bul másele turǵysynda uzaq ýaqyt boıy jumys istedi»,-dedi ol.

Sóz sońynda Q. Sultanov elimizde adamgershilikke jat jaǵdaılarǵa jol bermes úshin aldyn alý baǵytyndaǵy máselelerge erekshe nazar aýdarý qajettigin atap ótti.