Ótken jyly 4 myńnan asa egiz jáne 43 úshem dúnıege keldi

NUR-SULTAN. QazAqparat – 2021 jyly elimizde 4 216 egiz jáne 43 úshem dúnıege keldi. Mundaı máletti Ulttyq statıstıka bıýrosy usyndy, dep habarlaıdy QazAqparat tilshisi.

Vedomstvo málimetinshe, 2021 jyly Qazaqstan Respýblıkasynda AHAT organdary 446 491 balanyń týǵanyn tirkedi. Bul 2020 jylmen salystyrǵanda 4,6 paıyzǵa kóp jáne sońǵy 10 jyldaǵy eń joǵary kórsetkish. Qalalyq jerde týǵandar sany – 262 507 sábı (58,8%), aýyldyq jerde – 183 984 sábı (41,2%).

2021 jyldyń nátıjesi boıynsha 230 272 ul (51,6%), 216 219 qyz (48,4%) týǵan. Týǵan kezdegi jynystardyń araqatynasy 100 qyz balaǵa shaqqanda 106,5 er balany quraıdy.

Týýdyń jalpy koeffıtsıenti 1000 adamǵa 2021 jyly 23,50 (2020j. – 22,76) týǵandardy qurady. Qalalyq jerde – 23,34 (2020j. – 22,60), aýyldarda – 23,75 (2020j. – 22,98).

Qazaqstan óńirleriniń ishinde týýdyń eń joǵary deńgeıi Shymkent qalasynda (1000 turǵynǵa shaqqanda 32,35 týý), Mańǵystaý (31,98) jáne Túrkistan (31,58) oblystarynda baıqaldy. Eń tómengi kórsetkish Soltústik Qazaqstan (12,01), Qostanaı (12,97) jáne Pavlodar (15,58) oblystarynda tirkeldi.

Urpaqty bolý kezeńinde (15-49 jas) bir áıeldiń orta eseppen alǵanda dúnıege ákelgen balalarynyń sanyn kórsetetin týýdyń jıyntyq koeffıtsıenti (TJK) 2021 jyly respýblıka boıynsha 3,32 qurady (2020 j - 3,13), qalalyq jerde – 3,08 (2020 j - 2,89), aýyldarda – 3,75 (2020 j – 3,53).

El óńirleri boıynsha eń joǵary TJK deńgeıi Túrkistan (5,10), Mańǵystaý (4,57) oblystarynda, al eń tómeni – Qostanaı (1,88) jáne Soltústik Qazaqstan (1,97) oblystarynda baıqaldy.

2021 jyly áıelderdiń bala týý kezindegi ortasha jasy 29,5 (2020 j – 29,3), qalalyq jerde – 29,9 (2020 j – 29,6), aýyldarda – 29,1 jasty (2020 j – 28,9) qurady.

Qazaqstannyń basym óńirinde bala týý kezindegi áıelderdiń ortasha jasy ortasha respýblıkalyq deńgeıden joǵary boldy. Shyǵys Qazaqstan oblysynda bul kórsetkish - 33,3 jasty, Nur-Sultan qalasynda - 30,3 jasty, Almaty qalasynda 30,2 jasty qurady.

2021 jyly dúnıege birinshi balany ákelýdiń úlesi 2020 jylmen salystyrǵanda sol deńgeıde qaldy. Ekinshi jáne úshinshi balany týý tómendedi, al tórtinshi jáne kelesi týýlar úshin ósti. Ótken jyly 4 216 (2020 j – 4286) egiz jáne 43 (2020 j – 45) úshem dúnıege keldi.