Ótken jyly 25 bala terezeden qulap kóz jumǵan

ASTANA. QazAqparat – 2022 jyly 200-ge jýyq bala terezeden qulap, onyń 25-i kóz jumdy. Mundaı derekter Ashyq NQA portalynda jarııalanǵan «Balalardy zorlyq-zombylyqtan qorǵaý, sýıtsıdtiń aldyn alý, olardyń quqyqtary men salamattyǵyn qamtamasyz etý jónindegi 2023-2025 jyldarǵa arnalǵan keshendi josparynda» keltirilgen, dep habarlaıdy QazAqparat tilshisi.

«Densaýlyq saqtaý mınıstrliginiń málimetinshe, respýblıkada jyl saıyn 600 myńnan astam adam jaraqat alady. Onyń 22%-dan astamy nemese 130 myń bala muzǵa túsip ketý, terezeden qulaý, jol-kólik apaty sııaqty oqıǵalarǵa ushyraıdy. ıAǵnı, kún saıyn 360 bala zardap shegedi. Tek ótken jyly ǵana balalardyń terezeden qulaýynyń 200-ge jýyq faktisi tirkeldi. Saldarynan 25 bala qaıtys boldy. Jol apatynan 232 bala qaza taýyp, 3 652 bala zardap shekti», - dep jazylǵan Oqý-aǵartý mınıstrligi talqylaýǵa shyǵarǵan tujyrymdamada.

Sonymen qatar ótken jyly mınıstrlik respýblıka boıynsha balalardyń áleýmettik jaǵdaıyna monıtorıng júrgizgen.

Onyń nátıjesinde búldirshinder men jasóspirimderdiń ál-aýqat deńgeıi orta eseppen 55,3 bal boldy.

Ásirese, Qostanaı (49,7 ball), Batys Qazaqstan (47,4 ball) jáne Aqmola (43,8 ball) oblystary balalar úshin áleýmettik turǵydan qolaısyz óńirler dep tanyldy.

Buǵan qosa, mınıstrlik usynǵan aqparatqa saı, ótken jyly balalarǵa qatysty jynystyq sıpattaǵy 719 qylmys jasaldy.