Ótken jyly 2 myńǵa jýyq áskerı qyzmetker baspanamen qamtyldy

ASTANA. QazAqparat - 2018 jyly 2 myńǵa jýyq áskerı qyzmetker jekemenshik baspanamen qamtylsa, odan bólek 40 myńǵa jýyq sala mamandary turǵyn úı tólemderimen qamtamasyz etildi. Bul týraly QR Qorǵanys vıtse-mınıstri, general-leıtenant Talǵat Muhtarov OKQ-de ótken baspasóz máslıhatynda málim etti, dep habarlaıdy QazAqparat tilshisi.

«Bizde áskerı qyzmetkerlerdi baspanamen qamtamasyz etýdiń jańa modeli qoldanysqa engizildi. Ol boıynsha 2018 jyldyń 1 qańtarynan bastap aı saıyn olardyń jeke esepshottaryna eńbek ótiline qaramastan ekinshi deńgeıli bankter arqyly turǵyn úı tólemi aýdarylady. Al baspana alý máselesine kelsek, ótken jyly 19 myń áskerı maman qyzmettik baspanamen, 2 myńǵa maman jekemenshik turǵyn úımen, sondaı-aq 39 759 qyzmetker turǵyn úı tólemderimen qamtamasyz etildi», - dedi ol.

Odan bólek, vıtse-mınıstr áskerı qyzmetkerlerdiń jalaqy máselesine toqtalyp ótti.

«2017 jyldan bastap Joǵarǵy Bas qolbasshynyń tapsyrmasymen áskerı qyzmetkerler men ushqyshtardyń jalaqysy kóterildi. Áskerı ushqyshtarǵa qaraǵanda Azamattyq avıatsııa salasynyń ushqyshtary joǵary jalaqy alatyny jasyryn emes. Osy maqsatta ótken jyldan bastap barlyq áskerı qyzmetkerlerdiń jalaqysy 25%, odan bólek qosymsha ústemaqy kólemi 30% artty.

Atap aıtqanda, qorǵanys salasyndaǵy mamandardyń jalaqysyn ósirý josparly túrde júzege asyrylýda. Búginde ortasha eseppen ofıtserler 140-150 myń teńgeden joǵary alady», - dedi T.Muhtarov.

Eske sala ketsek, buǵan deıin mınıstrdiń orynbasary áskerdegi álimjettik jasaýdyń azaıǵanyn tilge tıek etken bolatyn.