Ótken jyly 14 myń qazaqstandyq jeńildetilgen ıpoteka aldy
2020 jyldyń qorytyndysy boıynsha elimizde 15,3 mln sharshy metr nemese 140 myń turǵyn úı paıdalanýǵa berilgen. Bul 2019 jylǵy kezeńnen 17% joǵary.
«Rekordtyq kólemge jetý úshin biz jergilikti atqarýshy organdardy 281,2 mlrd teńgege qarjylandyrdyq. Ákimdikter 28 myń páterdi nemese elde salynǵan turǵyn úıdiń jalpy kóleminiń 20%-yn belgilengen baǵamen tapsyrdy. Otbasy banki arqyly halyqqa «Baqytty otbasy» jáne «5-10-20» áleýmettik baǵyttaryn qosa alǵanda, 145,7 mlrd teńgege 14,3 myń jeńildetilgen nesıe berildi. Bıyl aldymyzǵa ańaǵurlym bıik mindet qoıyldy – bul barlyq qarjy kózderi esebinen 17 mln sharshy metr nemese 163 myń turǵyn úı salý», - dedi Á. Omarqojaev QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda.
Almaty oblysynyń turǵyny Ulzıra Tólepbergen – «Baqytty otbasy» baǵdarlamasymen baspana alǵan jandardyń biri.
«Men jalǵyzbasty anamyn jáne múgedek bala asyrap otyrǵan otbasy sanaty boıynsha «Baqytty otbasy» baǵdarlamasymen baspana aldym. Shamamen 7-8 jyl boıy otbasymyzben páter jaldap júrdik. Kommýnaldyq tólemderdi qosqanda aı saıyn 60 myń teńge tóleıtin edik. 2018 jyly ákimdikke baspana kezegine turyp, Otbasy qurylys jınaq bankinen (Qazirgi «Otbasy bank» - red.) esepshot ashtym jáne aı saıyn 50 myń teńgeden aqsha jınadym. Ákimdik baǵyt-baǵdar berip otyrdy jáne bastapqy jarna úshin 500 myń teńge esepshotyma aýdardy. Bul – jalǵyzbasty analar úshin úlken kómek», - deıdi U. Tólepbergen QazAqparat tilshisine bergen suhbatynda.
«Baqytty otbasy» baǵdarlamasy boıynsha, iri qalalarda 15 mln teńgege deıin, al oblystarda – 10 mln teńgege deıin baspana alýǵa bolady.
«Ol úshin ákimdikke kezekke turý anyqtamasy, balalardyń týý týraly kýáligi, nekeni buzý týraly kýálik, balanyń múgedektigi týraly qujat jáne jyljymaıtyn múliktiń joqtyǵy týraly anyqtama ótkizdim. Bastapqy jarnaǵa alatyn úıdiń 10 paıyzyn jınaý kerek. Ákimdik qosqan 500 myń teńgege ózim jınaǵan 500 myń teńgeni qosyp, Talǵar qalasynan úsh bólmeli páter aldym. Úıimiz keń, 92 sharshy metr, ekinshi naryqtan ózim tańdap aldym», - deıdi U. Tólepbergen.
Sonymen birge, bıyl 26 qańtarda Úkimettiń keńeıtilgen otyrysynda Memleket basshysy turǵyn úı saıasatyn jetildirý boıynsha usynystar ázirleýdi tapsyrdy. Osyǵan baılanysty «Báıterek» holdıngi Indýstrııa jáne ınfraqurylymdyq damý mınıstrligimen birlesip qosymsha tetikter ázirlegen.
«Eń aldymen, Otbasy bank bazasynda Turǵyn úımen qamtamasyz etý jónindegi ortalyq qurylady, osylaısha turǵyn úıge muqtajdardy esepke alý jáne kezekke qoıý bir ortalyqtan júzege asyrylady. Zańnamalyq ózgerister qabyldanǵan soń, bul ortalyq jeke tulǵalardyń memlekettik derekqorymen biriktiriledi. Blokcheın jáne smart brıdj tehnologııalaryn qoldana otyryp, barlyq bıznes-protsesterdi avtomattandyrýdy josparlap otyrmyz. Bul azamattardy esepke alý men turǵyn úıdi bólýde adamı faktorǵa jol bermeı, ashyqtyqty qamtamasyz etedi. Al qujattarǵa qol qoıý jáne tirkeý ýaqyty 3 esege, ıaǵnı 3 kúnnen 1 kúnge qysqarady», - deıdi spıker.