Ótken jyl Elbasymyzdyń Ulytaý tórindegi tolǵanysymen de este qalǵany anyq - Á.Muhanbetqalıev, BQO
Onyń aıtýynsha, kókiregi oıaý, kózi qaraqty ár azamat el bolashaǵyn, halyq keleshegin oılamaı tura almaıdy. Mine, osyndaı azamattyqtyń tamasha úlgisin Elbasymyzdyń tulǵasynan tanyp kelemiz. Qazirgi kezdegi ózge elderdegi aýmaly-tókpeli jaǵdaı, óz elimizdegi dil men din tóńiregindegi ahýal barsha jannyń da júreginde belgili bir alańdaýshylyq týǵyzyp, oılantyp otyrǵany jasyryn emes. Elbasymyzdyń osy suhbatynda elge, halyqqa, árbir qazaqstandyqqa qarata aıtqan sózderi sol ýaıymnyń tumanyn seıiltip, bolashaqqa degen senimimizdi shyńdap, boıymyzǵa qaırat quıǵandaı.
Prezıdenttiń álemde bolyp jatqan jaǵdaıdy kúni buryn boljap, Joldaýdy erterek jarııalap, Táýelsizdik kúnine arnalǵan jıynda tebirene sóıleýi de ár azamattyń júregine jol tartty dep oılaımyn. Nursultan Ábishuly Ulytaý tórindegi suhbatynda din máselesi týraly, memleketimizdiń dinı sala boıynsha júrgizip otyrǵan saıasaty jaıynda anyq ta aıqyn, túsinikti etip aıtyp berdi. Rasynda da, el ishindegi jekelegen teris baǵyttaǵy dinı aǵymdar ýaǵyzyna aldanyp, shynaıy musylmandyq joldan adasyp, óziniń ǵumyrlyq maqsaty men adamdyq mindetin taba almaı júrgen jastarymyzdyń bar ekendigi málim. Sonymen qatar, Prezıdent óz sózinde «Qurannyń qasıetti úkimderin oryndaý úshin kemtarlarǵa kómektesý, bir-birimizge janymyz ashyp, baýyrmal bolý, úlkendi syılaý, balany tárbıelep ósirý, otandy, eldi qorǵaý, birlikke shaqyrý arqyly dindi órkendetken jón. Sonda dinniń memleketke zor paıdasy, úlken qamqorlyǵy bolady. Ol eldiń basyn biriktiredi. Mine, osyndaı ıslamdy qurmetteýimiz kerek», - deı kele, dinniń eldi uıytýshy, halyqty biriktirýshi tegeýirini bar zor kúsh ekenin aıtty. Al osy baǵyttan taıǵan, eldi biriktirýdiń ornyna iritki salyp, talaılardyń kóz jasyna qalatyn «ilimderge» bizdiń qoǵamymyzda oryn joq ekendigin túsinikti jetkizdi. Ulttyń ulttyǵyn aıǵaqtaıtyn, onyń ózindik tarıhı, mádenı ereksheligin bildiretin mańyzdy faktordyń biri - onyń tili. Elbasymyz til tóńiregindegi birqatar keleli máselelerdi de qozǵaı kele, tól tilimizdiń qaıtalanbas kolorıtin saqtap, ony órkendetý baǵytyndaǵy memleketimiz ustanǵan «ózge tildiń bárin bilip, óz tilimizdi qurmetteýge» baǵyttalǵan saıasattyń bolmysyn qarapaıym sózdermen-aq tamasha jetkizdi, san alýan ult pen ulystyń atamekeni bop otyrǵan jerimiz ben qazaqy qonaqjaılyǵymen támam jurtty baýyryna basqan elimizdiń beıbit súıgish bolmysyn aıqyn kórsetip berdi. «Tatý tirligin, beıbit aspanyn qadirlemegen eldiń taǵdyr-talaıy qandaı bolatyndyǵyn kózimiz kórip otyr emes pe? Endeshe, osynaý tatýlyq, kelisim men ózara túsinistik sekildi uly qundylyqtarymyz túgel turǵanda, tilimiz de, dinimiz de, dilimiz de órkendeıtindigin umytpaǵanymyz abzal. Buǵan joǵary oqý orny jáne basqa da bilim ordalarynda sabaq beretin ustazdar da óz úlesin qosyp, sol qundylyqtardy jastardyń boıyna sińire bilýi kerek. Sonda ǵana erteńimiz jarqyn, keleshegimiz kelisti bolmaq», dedi Á.Muhanbetqalıev.