Ótken jyly monoqalalardaǵy ónerkásiptik óndiris kólemi 15 paıyzǵa tómendedi

<p>ASTANA. KAZINFORM &ndash; Ótken jyldyń qorytyndysynda monoqalalardaǵy ónerkásiptik óndiris kólemi 15 paıyzǵa tómendedi. Bul týraly Úkimet otyrysynda Premer-Mınıstrdiń orynbasary &ndash; Ulttyq ekonomıka mınıstri Nurlan Baıbazarov aıtty.</p>

«Qazirgi ýaqytta Qazaqstanda 1,4 mln halqymen 20 monoqala bar. Monoqalalar eldiń ónerkásiptik óndirisine aıtarlyqtaı úles qosatynyn atap ótken jón. 2023 jyldyń qorytyndysy boıynsha eldiń ónerkásiptik óndiris kóleminiń 40 paıyzy osy qalalarǵa tıesili. Qala quraýshy kásiporyndardyń bolýy jáne olardyń turaqty jumys jasaýy monoqalardyń áleýmettik-ekonomıkalyq damýyna oń áser etedi. Búgingi kúni monoqalalarda munaı-gaz, kómir, boksıt, temir kenderin óndirý jáne basqa da baǵyttarda 23 qala quraýshy kásiporyn jumys isteıdi», - dedi mınıstr.

Onyń dereginshe, 2023 jyldyń qorytyndysy boıynsha ónerkásiptik óndiristiń kólemi 18,5 trln teńgeni qurady. Bul 2022 jylmen salystyrǵanda 15 paıyzǵa tómendedi.

«Osy baǵyttaǵy kórsetkishtiń eń kóp tómendeýi Temirtaý, Balqash jáne Qulsary qalalarynda baıqalady. Bul rette ónerkásiptik óndiristiń naqty kólem ındeksiniń tómendeýi Stepnogorsk, Balqash jáne Qarajal qalalarynda tirkeldi. 2023 jyly negizgi kapıtalǵa salynǵan ınvestıtsııalar kólemi 4,2 trln teńgeni qurady jáne 2022 jylmen salystyrǵanda 6,1 paıyzǵa ósti. Kórsetkishterdiń Jańaózen qalasynda 3 esege jýyq jáne Aqsý qalasynda 1,7 esege ósýi baıqalady. Monoqalalarda jumys istep turǵan shaǵyn jáne orta kásipkerler sýbektileriniń sany ótken jylmen salystyrǵanda 92,3 myńnan 100,2 myń birlikke deıin ulǵaıdy. Sondaı-aq 2023 jyldyń qorytyndysy boıynsha jumyssyzdyq deńgeıi 4,3 paıyzdy qurady», - dedi Nurlan Baıbazarov.