Ótken jyly Qazaqstanda e-kommertsııa kólemi 2,2 trln teńgeden asty
«Qazirgi tańda álem elderinde elektrondy saýda naryǵy toqtaýsyz damyp keledi. 2025 jylǵa qaraı álemdegi ınternet-saýdanyń úlesi bólshek saýdadan 25%-ke asyp túsedi dep kútilýde. Buǵan onlaın jáne oflaın-dúkenderdiń bıznes-protsesteriniń ózgerýi, ónimdi ornalastyrý men jarnamalaýdyń jańa formattary yqpal etip otyr. Munyń barlyǵy satyp alýshylardy keńinen tartýǵa múmkindik beredi ári olardyń ýaqytyn únemdeıdi», — dedi Álıhan Smaıylov Úkimet otyrysynda.
2023 jyly Qazaqstanda e-kommertsııa kólemi 2,2 trln teńgeden asyp, búkil bólshek saýdanyń 13%-in qurady. Eldegi naryqtyń aýqymdy bóligi sheteldik ınternet-alańdarǵa tıesili.
«Osy múmkindikti óz ónimderimizdi álemdik naryqta ótkizýdiń qosymsha kanaly retinde paıdalanýymyz kerek. Sonymen qatar, otandyq onlaın-dúkenderdi de damytý qajet. Ol úshin tólem júıeleriniń, kólik-logıstıka ınfraqurylymynyń jáne kýrerlik qyzmetterdiń úzdiksiz jumysyn qamtamasyz etý kerek», — dedi ol.
Tutynýshylardyń quqyqtaryn qorǵaý úshin de qajetti túzetýler ázirlenip, «Tutynýshylardyń quqyqtaryn qorǵaý týraly» zań jobasyna engizildi. Bul qujat qazir Parlament qaraýynda.
«Otandyq onlaın-dúkenderdi damytý boıynsha tıimdi sheshimder 1 aı merzimde ázirlenýi tıis. Sondaı-aq, otandyq taýar óndirýshilerdiń sheteldik ınternet-alańdarǵa shyǵýyna belsendi túrde járdemdesý mańyzdy. Ekinshiden, bizge ózimizdiń bondtyq qoımalarymyz qajet. Olar taýarlardy elimizdegi satyp alýshylarǵa, sol sııaqty sheteldikterge jetkizý protsesin ońaılatýǵa múmkindik berer edi. Sondyqtan, Saýda mınıstrligi „Qazposhtamen“ birlesip, bıyl Astana, Almaty jáne Shymkent qalalarynda bondtyq qoımalar qurylysyn bastaýy kerek», — dep tapsyrma berdi Úkimet basshysy.
Sonymen birge, Saýda mınıstrligine Kólik mınıstrligimen jáne Ulttyq poshta operatorymen birlesip, naýryz aıynyń sońyna deıin Aqtaýda konteınerlik habty jáne Quryq portynda elektrondy saýdanyń tolyqqandy logıstıka ortalyǵyn qurý tapsyrmasy berildi.