Ótken jyly el aýmaǵynda 22 tonna esirtki tárkilendi

<p>ASTANA. KAZINFORM &ndash; Byltyr elimizde 12 aıdyń ishinde 3 myńnan astam esirtki qylmysy tirkelgen. Bul týraly Іshki ister mınıstrliginiń keńeıtilgen alqa otyrysynda aıtyldy.</p>

- 12 aı ishinde 7920 esirtki quqyq buzýshylyǵy anyqtaldy, onyń ishinde 3430-y qylmys. Shamamen 22 tonna esirtki tárkilenip, 63 esirtki zerthanasy joıyldy. Odan bólek, uıymdasqan qylmysqa qarsy kúres – polıtsııa jumysyndaǵy negizgi baǵyttardyń biri. Uıymdasqan qylmystyq topqa basshylyq etip, oǵan qatysýdyń 45 faktisi anyqtalyp, joly kesildi, onyń ishinde úsheýi transulttyq bolǵan. Sondaı-aq 1361 joǵalǵan adamnyń mekenjaıy anyqtaldy, - dep habarlaıdy vedomstvodan.

Osy oraıda mınıstrlik janynan esirtki qylmysyna qarsy kúres komıteti quryldy.

- Sońǵy jyldary kıberqylmysqa qarsy kúres erekshe mańyzǵa ıe. Bul máseleni sheshý úshin vedomstvoda beıindi departament ashyldy. Jedel-izdestirý is-sharalary nátıjesinde aýyr jáne asa aýyr qylmystar úshin izdeýde júrgen 1949 adam ustaldy, - delingen habarlamada.

Aıta ketsek, byltyr polıtsııa esirtki jetkizýdiń 94 ishki arnasyn joıdy.