Ótken jyly 9,2 mln sheteldik Qazaqstanǵa saıahattady
«Ótken jyldyń qorytyndysy boıynsha týrıstik sala pandemııadan keıin tolyq qalpyna kelip qana qoımaı, salanyń negizgi kórsetkishteri boıynsha tarıhı eń joǵary deńgeıge jetti. Sońǵy jyly elge 9,2 mln sheteldik azamat keldi. Bul 2022 jylǵy kórsetkishten 2 ese kóp. El ishinde 9,6 mln-nan astam otandyq azamat saıahat jasady. Kórsetkish 2022 jyldan 1 mln adamǵa asty. Ornalastyrý oryndary 229 mlrd teńgeden astam somaǵa qyzmet kórsetti. Bul 2022 jylǵy kórsetkishten 1,3 ese kóp. Týrızm salasynan bıýdjetke túsetin salyq túsimderi 450 mlrd teńgeni qurady. 2022 jyly kórsetkishten 64 mlrd teńgege artyq», - dedi mınıstr.
Onyń aıtýynsha, oǵaryda atalǵan dınamıka sala damýynyń oń úrdisterin aıǵaqtaıdy.
«2023 jyly negizgi kapıtalǵa ınvestıtsııalar boıynsha joǵary kórsetkishke jettik. Osy kezeńde negizgi kaıtalǵa ınvestıtsııalar kólemi 787 mlrd teńgeni qurady. Bul ótken jyldyń 12 aıymen salystyrǵanda 53 paıyzǵa artyq. Sonymen qatar osy jyldyń І-toqsanynyń qorytyndysy oń dınamıkany kórsetip, 3 esege artty jáne 177 mlrd teńgege jetti. Alaıda, Batys Qazaqstan, Pavlodar, Aqmola, Qaraǵandy, Atyraý jáne Jetisý oblystarynda teris dınamıka baıqalady. Kórsetkishterdiń tómendeýi 7-den 60 paıyzǵa deıin qurady», - dedi Ermek Marjyqpaev.