Ótken tórt aıda Qazaqstandaǵy 27 myńnan astam otbasy baspanaǵa ıe boldy - UEM

ASTANA. QazAqparat - Aǵymdaǵy jyldyń tórt aıynda Qazaqstanda 27 myńnan astam otbasy jańa baspanaǵa ıe boldy. Bul týraly Májiliste «Nurly jol» baǵdarlamasyn iske asyrý sheńberinde jalǵa beriletin turǵyn úı qurylysynyń barysy men turǵyn úı ınfraqurylymyn nyǵaıtý sharalary» atty dóńgelek ústelde Ulttyq ekonomıka vıtse-mınıstri Roman Sklıar osylaı málim etti.

«Aǵymdaǵy jyldyń tórt aıynyń qorytyndysy boıynsha 3,2 mln. sharshy metr turǵyn úı paıdalanýǵa berildi. Bul 2015 jyldyń osyǵan sáıkes kezeńine qaraǵanda, 121,6 paıyzǵa artyq. Osynyń nátıjesinde respýblıka boıynsha ótken tórt aıda 27 myńnan astam otbasy ózderiniń baspanaǵa qatysty máselesin jaqsartty», - dep atap ótti vıtse-mınıstr.

Keltirilgen málimetterge qaraǵanda, 2015-2016 jyly Ulttyq qoryń qarajaty esebinen jalǵa beriletin turǵyn úıdiń qurylysyna jáne qajetti ınjenerlik ınfraqurylym salýǵa 150 mlrd teńge shamasynda qarjylandyrý kózdelip otyr. Bunyń ishinde 11 mlrd teńge jalǵa beriletin turǵyn úı qurylysyna jáne satyp alýǵa Ulttyq qor qarajaty 2015 jyly - 92,5 mlrd teńge, 2016 jyly 22,5 mlrd teńge qarastyrylǵan.
Jalpy, 2015 jyldyń qorytyndysy boıynsha elimizde 8,9 mln. sharshy metr baspana paıdalanýǵa berilgen, bul 2014 jylmen salystyrǵanda 119% artyq. Onyń ishinde memlekettik kásiporyndar men uıymdar tarapynan salynǵan baspana 1,45 mln sharshy metrdi qurady, bul respýblıka boıynsha paıdalanýǵa berilgen baspanalardyń 16,3% teń. Al jeke menshiktegi kásiporyndar men uıymdar, sonymen qatar, halyqtyń óz tarapynan salynǵan baspanalar kólemi 7,4 mln sharshy metrdi qurap otyr. Bul respýblıka boıynsha jalpy paıdalanýǵa berilgen baspanalardyń 83,7 paıyzyna teń.