Ótken táýlikte Qaraǵandy oblysynda qar qursaýynan 68 adam qutqarylyp, 114 adam evakýatsııalandy

QARAǴANDY. QazAqparat – Qaraǵandy oblysynda ótken táýlikte qutqarýshylar qar qursaýynan 68 adamdy, onyń ishinde jeti balany shyǵaryp, 50 adamdy evakýatsııalady. Sondaı-aq, 32 tehnıka súırep shyǵaryldy. Kólik salondarynda 64 adam bolǵan, dep habarlaıdy QazAqparat tilshisi.

Qaraǵandy, Temirtaý jáne oblystyń bes aýdanynda ótken qutqarý jumystaryna TJ departamentiniń qyzmetkerleri, jergilikti polıtsııa qyzmeti, atqarýshy organdar men jol qyzmetteri qatysty.

23 naýryz kúni keshke Qaraǵandydaǵy «Ortalyqtranszavod» JShS aýmaǵynan jedel járdem kóligin kútip turmastan TJD kúshimen shuǵyl túrde aýrýhanaǵa jatqyzýdy qajet etetin er adam tasymaldandy.

Buqar jyraý aýdanynda da 23 naýryz kúni keshke qutqarýshylar Qaraqudyq aýylyndaǵy úıden shyǵyp, jaıaý Doskeıge bet alǵan 1985 jyly týǵan er adamdy izdedi. Ol mejeli jerge der kezinde jetpegen. 24 naýryz kúni saǵat 00:10-da izdeý toby Qaraqudyq aýylynan 10 shaqyrym jerde joǵalyp ketken adamdy tapty. Oǵan medıtsınalyq kómek qajet bolmady.

Sondaı-aq, Buqar jyraý aýdanyndaǵy «Sát-Kómir» AQ aýmaǵynan TJD qyzmetkerleri 24 naýryzda tańǵy saǵat tórt shamasynda shuǵyl aýrýhanaǵa jatqyzýdy qajet etken er adamdy Botaqara aýrýhanasyna jetkizdi.

Qaraǵandy oblysynyń aýmaǵynda daýyldy eskertý jalǵasýda. Óńirdiń basym bóliginde burqasyn basylar emes. TJD aýa raıynyń nasharlaýy kezinde eldi mekenderden tys jerlerge jol júrýden bas tartýdy, aýa raıynyń ózgerýine sáıkes kıinýdi jáne ózimen baılanys quraldaryn alyp júrýdi usynady.

Barlyq oqıǵalar men TJ týraly 112 nemese (8-7212) 43-36-36, 43-37-37 telefondary boıynsha habarlasýǵa bolady.