Ótken táýlikte elimizdiń sý aıdyndarynda 5 adam qutqaryldy

ASTANA. QazAqparat - Ótken táýlikte qutqarýshylardyń jedel is-qımyldarynyń arqasynda Aqmola, Shyǵys Qazaqstan, Batys Qazaqstan jáne Mańǵystaý oblystarynda 5 adam, onyń ishinde 2 jasóspirim qutqaryldy, dep habarlaıdy QazAqparat.

Máselen, keshe keshke Aqmola oblysy Kókshetaý qalasynyń qutqarýshylary Qopa kólin patrýldeý kezinde 1993 jyly týǵan er adamdy qutqaryp, jaǵaǵa jetkizdi, ol mas kúıinde jaǵadan 600-700 metrge júzip, óz kúshimen jaǵaǵa jete almaǵan.

Osyǵan uqsas jaǵdaı Óskemen qalasynda tirkeldi, onda óńirdiń qutqarýshylary Ertis ózenin patrýldeý kezinde 1974 jyly týǵan er adamdy qutqaryp, jaǵaǵa jetkizdi. Er adam mas kúıinde ózenniń ortasynda shomylyp, jaǵaǵa óz kúshimen jete almaǵan.

Sonymen qatar, Derkól kentinde Shaǵan ózenin patrýldeý barysynda Batys Qazaqstan oblysynyń qutqarýshylary 2006 jyly týǵan eki jasóspirimdi qutqardy. Jasóspirimder shomylýǵa ruqsat etilmegen orynda shomylyp, jaǵaǵa jete almaǵan.

Mańǵystaý oblysy Aqtaý qalasynyń qutqarýshylary Kaspıı teńiziniń jaǵalaýyn patrýldeý kezinde 2002 jyly týǵan jigitti qutqaryp, jaǵaǵa jetkizdi.

Jyl basynan beri shomylýǵa ruqsat etilmegen oryndarda shomylǵany úshin 2 702 adamǵa 23 810 728 teńge somasyna aıyppul salynǵanyn atap ótken jón.

TJM azamattarǵa sýdaǵy qarapaıym qaýipsiz júris-turys qaǵıdalaryn saqtaýǵa keńes beredi.

Qıyn jaǵdaıǵa tap bolmas úshin, sýdaǵy qarapaıym qaýipsizdik erejelerin qatań saqtaý qajet.