Ótken aıda ınflıatsııa deńgeıi qandaı boldy – Ulttyq bank málimeti
«Jyldyq ınflıatsııa boljamdy dıapazon aralyǵynda qalyptasyp, maýsym aıynda 14,6 paıyzdy qurady. Azyq-túlik jáne azyq-túlikke jatpaıtyn komponentter jalpy ınflıatsııanyń tómendeýine kóptep úles qosýda. Tamaq ónimderi baǵasynyń ósýi maýsym aıynda aıtarlyqtaı baıaýlap, 14,6 paıyz boldy. Azyq-túlikke jatpaıtyn taýarlar ınflıatsııasy 15,8 paıyzǵa deıin tómendedi. Qyzmetter qunynyń ósýi boljamdy traektorııaǵa sáıkes keldi jáne maýsym aıynda 13,3 paıyz boldy. Aılyq ınflıatsııa 0,5 paıyzǵa deıin baıaýlady», - dedi Ǵalymjan Pirmatov.
Onyń atap ótýinshe, bazalyq ınflıatsııaǵa birqatar baǵalaý júrgizilgen.
«Soǵan sáıkes, sońǵy aılarda ekonomıkadaǵy baǵa ósiminiń turaqty komponentteri meıilinshe álsiz baıaýlaǵanyn kórdik. Bul – proınflıatsııalyq ortanyń saqtalýymen baılanysty. Joǵary ınflıatsııalyq kútýler – ınflıatsııanyń tómendeýin tejeıtin faktorlardyń biri. Degenmen, onyń joǵary jáne turaqsyz dınamıkasynyń saqtalýy janar-jaǵarmaı men turǵyn úı kommýnaldyq qyzmetter baǵasynyń ósýimen baılanysty. Biz ony bazalyq mólsherleme boıynsha sheshimder qabyldaý kezinde aldyn ala eskerdik. Aldaǵy bir jylǵa kútiletin ınflıatsııanyń medıanasy maýsym aıynda 17,2 paıyzǵa deıin kóterildi. Seziletin ınflıatsııanyń kórsetkishi 18,8 paıyzǵa deıin tómendegenimen, áli de joǵary qalpynda qalyp otyr», - dedi UB tóraǵasy.