Ótken aptada elimizde 2,6 myńnan astam qylmys jasalǵan

ASTANA. QazAqparat – El aýmaǵynda ótken aptada 4 kisi ólimi jáne 3 qasaqana densaýlyqqa zııan keltirý faktisi tirkeldi. Bul týraly Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Eldegi krımınogendik jaǵdaıǵa toqtalaıyq. Bir apta ishinde 2 666 qylmys jasaldy, onyń 1 656 táýlik ishinde ashyldy. Polıtsııa qyzmetkerleri «izin sýytpaı» 4 kisi ólimi, 3 ólimge ákep soqtyryp, densaýlyqqa qasaqana aýyr zııan keltirý qylmysyn, 34 tonaý jáne 376 bóten múlikti urlaý faktisin ashty», - dedi Shuǵyla Turlybek mınıstrlikte ótken baspasóz máslıhatynda.

Odan bólek, vedomstvo ókili elordada ótken «Toqta, vandal!» aktsııasy týraly aıtty.

«Vandalızm, ǵımarattar men múlikti búldirý – qoǵam problemalarynyń biri. Mundaı áreketter qalanyń kórkeıýine keri áserin tıgizedi. Tipti, shalǵaı aımaqtardan bólek, elordanyń ózinde polıtsııa qyzmetkerleri atalǵan faktilerge jıi kýá bolyp jatyr. Ustamsyzdyq pen shekten tys agressııanyń kórinis tabýy zań men tártipti buzyp qana qoımaı, aınaladaǵylarǵa aıtarlyqtaı zııan nemese shyǵyn keltirýi múmkin. Máselen, 16 tamyzda túnde Astana turǵyny ǵımarattardyń birinen shyǵyp kele jatyp, quny jarty mıllıon teńgeden asatyn esikti syndyrǵan. Er adamnyń bul áreketi beınebaqylaý kamerasyna túsip qalǵan», - deıdi ol.