Ótemaqy ala almaı júrgen Taraz turǵyny shatyrdan sekirmek boldy

TARAZ. QazAqparat – Jumys barysynda alǵan jaraqaty úshin ótemaqy ala almaı júrgen Taraz turǵyny bıiktikten sekirip ólmek boldy, dep habarlaıdy QazAqparat tilshisi.

Oblystyq Polıtsııa departamentiniń málimetinshe, er adam qurylysy aıaqtalmaǵan bes qabatty ǵımarattyń shatyrynan sekirmek bolǵan.

Birneshe mınýttan keıin ýchaskelik polıtsııa qyzmetkeri ǵımarattyń tóbesine shyǵyp, jas jigitti áńgimege tartyp, raıynan qaıtarýǵa tyrysady.

«Belgili bolǵandaı, 29 jastaǵy jigit ózi jumys istegen kásiporyn basshysynyń ústinen shaǵymdanǵan. Ol jumys barysynda jaraqat alǵanyn jáne ol úshin áli kúnge deıin aqshalaı ótemaqy tólenbegenin aıtqan. Ózara dıalog kezinde polıtsııa qyzmetkeri oǵan baıyppen jaqyndap, sekirýge oqtalǵan sátte qolynan ustap, ózine tartyp qaldy», - delingen vedomstvonyń habarlamasynda.