«Otbasynyń birligi - Otannyń birligi» - bacpasózge sholý
Keshe Memleket basshysy Nursultan Nazarbaev «Mereıli otbasy» Ulttyq baıqaýy jeńimpazdaryn marapattaý rásimine qatysty. Elbasynyń arnaıy Jarlyǵymen, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń uıymdastyrýymen elimizdiń on tórt oblysy men Astana jáne Almaty qalalaryn qamtyǵan «Mereıli otbasy» ulttyq baıqaýy márege jetti. Sharaǵa N. Nazarbaev arnaıy qatysyp baıqaý jeńimpazyn quttyqtady. «Egemen Qazaqstan» gazetiniń senbilik sanynda Elbasynyń baıqaý jeńimpazdaryn marapattaý rásiminde sóılegen sózi berilip otyr. «Búgingi merekeniń tereń máni bar. Birinshiden, jerdegi órkenıettiń búkil hronologııasy - kez kelgen qoǵamnyń negizi retindegi Adamzat Otbasynyń Uly tarıhy. Ekinshiden, otbasy - óte uly qundylyq. Myńjyldyqtar men ǵasyrlardan beri otbasy árbir qoǵamnyń urpaqtan-urpaqqa jalǵasqan moraldyq salttardyń, ulttyq dástúrlerdiń saqtaýshysy bolyp tabylady. Úshinshiden, otbasy - óz halqyńa, onyń mádenıeti men turmysyna degen súıispenshiliktiń sarqylmas qaınar kózi. Ol ata-analar, balalar men nemereler baqytynyń prızmasy arqyly ótetin patrıotızm men Otannyń órkendeýine degen máńgilik qamqorlyqtyń qaınar kózi. Ol urpaqtardyń ǵasyrlyq ózara baılanysy. Tórtinshiden, HHІ ǵasyrda jahandaný dáýiri otbasy men baqytty neke qundylyqtaryn progrestiń mańyzdy sharttary etedi. Ony qazirgi zamanǵy álemniń barlyq tabysty elderiniń tájirıbeleri aıǵaqtaıdy», - deıdi Memleket basshysy. Elbasynyń sóılegen sózi «Otbasynyń birligi - Otannyń birligi» degen taqyryppen berildi.
«Egemen Qazaqstan» gazetiniń búgingi sanynda QR Mádenıet jáne sport mınıstri Tastanbek Esentaevtyń «El sportynyń erteńi eresen» degen taqyryppen kólemdi maqalasy jarııalandy. Maqalada avtor ústimizdegi jyldyń 16-28 tamyz aralyǵynda Qytaıdyń Nankın qalasynda ótken ІІ jazǵy Jasóspirimder Olımpıadasyndaǵy sportshylarymyzdyń jetistikterin aıta kele ketken kemshilikterdi de naqty kórsetken. «Endi Olımpıadalyq oıynda syndy iri jarystarǵa sportshylardy fýnktsıonaldyq turǵydan daıyndaý barysynda zamanaýı sporttyq medıtsına men ǵylymǵa basa mán berýimiz kerek. Óıtkeni, qazirgi zamandaǵy sportty medıtsınalyq ǵylymsyz kóz aldyńa elestetý tipti de múmkin emes. Jaýapty jarystarǵa daıyndyq barysynda zamanaýı medıtsınalyq-bıologııalyq tásilderdi jáne farmakologııalyq preparattardy qoldaný boıynsha ǵylymı-zertteý jumystaryn uıymdastyrý syndy qadaý-qadaý mindetter tur aldymyzda. Asyly, bul baǵytta búgingi kúnderi naqty sharýalardyń qolǵa alyna bastaýy tıis. Atap aıtqanda, ǵylymı turǵydaǵy oqytý-ádistemelik ortalyq qurylyp, onyń ıgiligin sportshylarymyz jaqyn arada kóretin bolady», - dedi ol.
***
"Aıqyn" gazetiniń jazýynsha, Aqtóbe sharýalary bıyl taǵy qýańshylyqtyń zardabyn tartyp otyr. Barlyǵy 309 myń gektardyń 138 myńy jaramsyz kúıge túsip, dán seýip, aldan úmit kútken dıqandardyń eńbegi esh ketken. Egindi alqaptyń úshten bir bóligine bıyl oraq túspedi. Qazir oblys sharýalary ortasha eseppen gektarynan 4,5 tsentnerden astyq jınaýdy aıaqtap qaldy. Birer kúnnen soń Hromtaý, Áıteke bı, Qarǵaly, Alǵa aýdandaryndaǵy jumys támamdalady. «Bıyl qys qatty, qarly bolǵanymen óńirde jyl ótken saıyn astyqtyń túsimi azaıyp keledi. Ótken jyly gektarynan 5 tsentner jınalsa, bıyl 4,5 tsentner alyndy. Qazir 288 myń gektar dándi daqyl qambaǵa quıylyp, jumystyń 93 paıyzy ótelgen eken», - delingen «Eginniń 31 paıyzy kúıip ketti» degen taqyryptaǵy aqparatta.