Otbasyndaǵy zorlyq-zombylyqqa jol bermeý baǵytynda Germanııa tájirıbesi iske asyrylmaq

ASTANA. QazAqparat – QR ІІM Ákimshilik polıtsııa komıteti tóraǵasynyń orynbasary Renat Zulqaıyrov otbasyndaǵy zorlyq-zombylyqqa jol bermeý baǵytynda Germanııa tájirıbesin iske asyrý josparlanyp otyrǵanyn aıtty, dep habarlaıdy QazAqparat tilshisi.

«Memleket basshysy qoǵammen birlesip, Qoǵamdyq qaýipsizdikti qamtamasyz etý tujyrymdamasyn, ázirleýdi tapsyrdy. Bul tujyrymdama keler bes jylda júzege asyrylady. Onyń basty ereksheligine toqtalsaq, qujat qoǵamdyq qaýipsizdik salasyndaǵy qordalanǵan júıelik problemalardyń sebepterin joıýǵa baǵyttalǵan. Bul turǵyda memlekettik organdardyń áreketteri durys úılestirilmegen. Ony retke keltirý úshin biz Germanııanyń tájirıbesin zerttedik. Bul elde tıisti memlekettik organdar men úkimettik emes uıymdar otbasyndaǵy zorlyq-zombylyq sebepterin anyqtaýǵa qatysady», - dedi R. Zulqaıyrov onlaın brıfıngide.

Onyń aıtýynsha, otbasynda janjal bolsa, polıtsııa qyzmetkerlerin kináli adamdy toqtatyp, qylmyskerdi jaýapqa tartyp, jedel jáne sapaly tergeý amaldaryn júrgizýi tıis. Odan ári tıisti ortalyqtar psıhologtardy tarta otyryp, bolǵan oqıǵanyń sebebin anyqtaıdy. Bul janjalǵa jumyssyzdyq sebep bolsa, máseleni sheshýge jumysqa ornalastyrý boıynsha áleýmettik qyzmetter de qosylady.

Budan buryn habarlanǵandaı, jaqynda QR Premer-Mınıstri Álıhan Smaıylovtyń tóraǵalyǵymen Úkimette ótken keńeste qoǵamdyq qaýipsizdikti azamattyq qoǵammen seriktestikte qamtamasyz etýdiń 2024-2028 jyldarǵa arnalǵan tujyrymdamasynyń jobasy qaraldy.