Otbasylyq zorlyq-zombylyqpen kúreske tık-tokerler men blogerlerdi tartý usynyldy

ASTANA. QazAqparat – Elimizde turmystyq zorlyq-zombylyq problemasyn sheshýdiń bir amaly retinde belsendi azamattardy, blogerler men tık-tokerlerdi iske tartyp, trend-vıdeolar jasaý usynyldy. Bul týraly QR ІІM Ákimshilik polıtsııa komıteti tóraǵasynyń orynbasary Renat Zulhaıyrov málim etti, dep habarlaıdy QazAqparat tilshisi.

«Polıtsııa turmystyq zorlyq-zombylyqtyń keshendi aldyn alý sharalaryn qabyldap jatyr. ıAǵnı profılaktıkalyq áńgimeden bastap qylmystyq jaýapkershilikke tartýǵa deıingi jumystar. Alaıda, statıstıka kórsetkendeı, jaǵdaı túbegeıli ózgermeı otyr. Óz kezeginde, kúsh qoldaný profılaktıkasy ajyrasýdyń ósýine, túrmege túsetinderdiń kóbeıýine, sondaı-aq áleýmettik narazylyqqa ákeledi. Turmystyq zorlyq-zombylyqpen tıimdi kúresý úshin áleýmettik qyzmet, balalardy qorǵaý mekemeleri, medıtsına qyzmetkerleri, úkimettik emes uıymdar jáne basqa da sýbektilermen birlesip keshendi tásil qurý qajet», - dedi Renat Zulhaıyrov Astanada ótken otbasylyq zorlyq-zombylyq máselelerine arnalǵan quqyqtyq forým barysynda.

Sondaı-aq Іshki ister mınıstrliginiń ókili turmystyq zorlyq-zombylyq máselesimen kúres sharasyna qoǵam belsendileri men tık-tokerler, blogerlerdi tartýdy usyndy.

«Qazir jastar Instagram jáne YouTube arqyly minez-qulyq stereotıpterin belsendi túrde sińirýde. Bizdiń qoǵam BAQ ınstıtýttary jumysynyń tıimdiligin arttyrýǵa asa muqtaj. Osy oraıda usynys: o tbasynda bolatyn túrli jaǵdaıdan habar beretin qysqasha ári maǵynaly rolıkter túsirý arqyly belsendilerdi, tık-tokerlerdi, blogerler men medıa tulǵalardy trend úshin tartýǵa bolady», - deıdi ol.