Otbasylyq janjaldan japa shekkender úshin 143 ortalyq ashylady - vıtse-mınıstr

ÓSKEMEN. QazAqparat – Aqparat jáne qoǵamdyq damý vıtse-mınıstri Evgenıı Kochetov Shyǵys Qazaqstan oblysyna jumys saparymen kelip, turǵyndarmen kezdesti, dep habarlaıdy QazAqparat tilshisi.

Óńir turǵyndarymen júzdesýde Evgenıı Kochetov kópbalaly otbasylardy jáne jastardy qoldaý maqsatynda qandaı sharalar atqarylyp jatqanyn aıtyp berdi.

«Otbasylarǵa qoldaý kórsetý, otbasylyq janjaldardy sheshý jáne balalary bar áıelderdi ýaqytsha ornalastyrý jónindegi ortalyqtardy qurý boıynsha jumys júrgizilýde. 2021-2022 jyldary elimizde 68 otbasyn qoldaý ortalyǵy ashyldy. 2025 jylǵa deıin taǵy 143 ortalyq ashý josparlanyp otyr», - dedi ol.

ShQO-da 3794 kópbalaly otbasy turady. Onyń ishinde 2660-ynda tórt jáne odan da kóp kámeletke tolmaǵan balalary bar. 152 az qamtylǵan otbasy ataýly áleýmettik kómek alady.

«Daryndy jastardy jáne olardyń túrli granttyq jobalaryn qoldaý jónindegi sharalar keshenin iske asyrý jalǵasady.2029 jylǵa deıin 1 mln aýyl jasyn jumysqa ornalastyrý, 1,5 mıllıon jastyń tsıfrlyq saýattylyǵyn arttyrý, 3,8 mıllıon jasty resýrstyq ortalyqtar arqyly áleýmettik qyzmettermen qamtamasyz etý kózdelýde, - dedi vıtse-mınıstr.

Evgenıı Kochetovtyń aıtýynsha, jastar men volonterlik bastamalardy damytýǵa baǵyttalǵan jobalardy granttyq qarjylandyrý ulǵaıady. Sondaı-aq jyl saıyn jas ǵalymdardyń zertteýlerine 1000 grant berilmek.