Otbasy múshelerin balaǵattaǵandardy qamaýǵa alý merzimin uzartý usynyldy

NUR-SULTAN. QazAqparat – Otbasynda janjal jasaǵandar kóbine keshirim surap qutylady. Bul týraly búgin Parlament Májilisiniń jalpy otyrysynda QR Bas prokýrordyń orynbasary Marat Ahmetjanov málim etti, dep habarlaıdy QazAqparat tilshisi.

«Zań jobasynda quqyq buzýshylarǵa jaýapkershilik sharalaryn qatańdatý usynylǵan. Osylaısha, otbasy múshelerine balaǵat sózder aıtqany, til tıgizgeni jáne olardyń qadir-qasıetin tómendetkeni úshin ákimshilik qamaýdy 5-ten 10 táýlikke deıin, al qaıtalap buzǵan jaǵdaıda 15 táýlikke deıin ulǵaıtý boıynsha túzetýler jumys tobynda qaralyp jatyr. Osy túzetý boıynsha Bas prokýratýra ókiliniń pikirin bilgim keledi», - dedi depýtat Nurjan Áshimbetov.

Óz kezeginde Marat Ahmetjanov jaýapkershilik sharalaryn kúsheıtýdi qoldaıtynyn jetkizdi.

«Degenmen, tıisti qataıtý sharalary ońtaıly nátıjesin bermeı jatyr. Byltyr tıisti zań qabyldanyp, qosymsha baptar engizilgen edi. Naqty turmystyq zorlyq-zombylyq jasaǵany úshin qamaýǵa alý kórsetilgen. Biraq ta sol normalardyń ózi qoldanylmaı keledi. Zań boıynsha kóbeıtkenimen, qoldanysta bolmaǵan soń onyń nátıjesi bolmaıdy. 5-ten 15 táýlikke deıin kóbeıtemiz de, jumys jasaldy dep otyramyz. Búginde osyny uıymdastyrý jaǵynan kemshilikter bar, ony moıyndaımyz», - dedi Bas prokýrordyń orynbasary.

Osy oraıda ol otbasynda janjal jasaǵandar tek bir táýlikke qamaýǵa alynyp, bosatylyp jatqanyn aıtty.

«Byltyr jeltoqsanda úsh táýlikten bes táýlikke deıin uzarttyq. Alaıda osy bap boıynsha sol 5 táýlikti alyp jatqan adam joq, barlyǵy bir táýlikpen shektelýde. Nege olaı bolyp jatyr? Óıtkeni bir táýlik boıynsha buzaqy adamdy alyp keledi de, ishki ister organdary 24 saǵat ustaıdy. Sotqa bergen kezde jábirlenýshiler, otbasy músheleri kelip, keshirim suraıdy da, bir táýlikpen toqtatylady», - dep túsindirdi Bas prokýrordyń orynbasary.

Bul turǵyda ol keshirim suraý tek bir ret bolýyn qoldaıtynyn, ekinshi ret qaıtalansa, qamaýǵa alý tártibi iske asyrylýy kerektigin aıtty.

«Ákimshilik kodekste uryp-soqqany úshin 15 táýlikke deıin, al jeńil jaraqat jasaǵany úshin 20 táýlikke qamaýǵa alý eskerilgen. Ókinishke qaraı, bul ınstıtýttar jumys istemeı tur», - dedi Marat Ahmetjanov.

Budan buryn habarlanǵandaı, Parlament Májilisiniń jalpy otyrysynda «Otbasylyq-turmystyq zorlyq-zombylyqqa qarsy is-qımyl týraly» zań jobasy, sondaı-aq «Qazaqstan Respýblıkasynyń keıbir zańnamalyq aktilerine otbasylyq-turmystyq zorlyq-zombylyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.