Otbasy kúni: ShQO-da «Otan otbasynan bastalady» atty festıval ótti

ÓSKEMEN. QazAqparat – Shyǵys Qazaqstan oblysynda Halyqaralyq Otbasy kúnine oraı festıval ótti, dep habarlaıdy QazAqparat tilshisi.

Óńirde 15 mamyr – Halyqaralyq Otbasy kúnine arnalǵan sharalar legi bastaldy. Óskemendegi Sol jaǵalaý saıabaǵynda «Otan otbasynan bastalady» atty festıval ótti.

Festıval shymyldyǵy otbasylyq toptardyń kontsertimen túrildi. Sodan soń mereke sporttyq estafetalarmen, qolónershiler jármeńkesimen, túrli oıyndar men kádesyılar satylymymen jalǵasty.

«Osyndaı sharalardyń otbasylyq qundylyqty arttyrary sózsiz. Qatysýshylar jarqyn emotsııa alyp, bir sergip qaldy. Januıadaǵy tatýlyq, syılastyq memlekettiń turaqtylyǵymen tyǵyz baılanysty», - deıdi Shyǵys Qazaqstan oblysy ákiminiń orynbasary Darhan Sapanov.

Kelýshiler nazaryna Óskemen qalasynyń kórkemsýret mektebiniń oqýshylary salǵan kartınalar da usynyldy. Balalar óz jumystarynda otbasylyq qundylyqtardy, bir-birine degen súıispenshilik pen qamqorlyqty qylqalam arqyly sýrettegen.