Otbasy isteri jáne balalar quqyǵyn qorǵaý agenttigin qurý usynyldy

ASTANA. QazAqparat – QR Parlamenti Májilisiniń depýtaty Dınara Zákıeva turmystyq zorlyq-zombylyqtyń aldyn alýǵa qatysty birqatar usynys aıtty. Atap aıtqanda, el óńirlerinde otbasy isteri jáne balalardyń quqyǵyn qorǵaý agenttigin ashý ıdeıasyn alǵa tartty, dep habarlaıdy QazAqparat tilshisi.

«Biz jedel áreket etý toby qyzmetiniń sheńberinde qıyn jaǵdaıǵa tap bolǵan otbasylardy anyqtaý boıynsha ishki ister mınıstrligi jáne óńirlermen birlesip jumys isteımiz. Bir jumys tobynda ýchaskelik polıtseıler men ákimdiktiń barlyq basqarmalarynyń ókilderi bar. Polıtsııa qıyndyqqa ushyraǵan otbasyny anyqtaǵan jaǵdaıda, derekti quzyrly basqarmalarǵa jiberedi. Odan ári otbasyǵa kómek kórsetý máselesi qaralady. Eki jyl ishinde túrli qıyndyqqa tap bolǵan 65 otbasy anyqtaldy. Onyń ishinde 17 myń otbasy qujatsyz bolǵan. Demek olar eshqandaı memlekettik kómek, qoldaý almaıdy degen sóz. Balalary mektepke bara almaıdy, ne aýrýhanaǵa júgine almaıdy», - dedi Dınara Zákıeva elordada ótken turmystyq zorlyq-zombylyqtyń aldyn alý máselelerine arnalǵan forýmda.

Osy oraıda halyq qalaýlysy ózi kótergen máseleni sheshýdiń birneshe jolyn usyndy.

«Birinshi usynys - otbasy isteri jáne balalardyń quqyǵyn qorǵaý jónindegi memlekettik agenttik qurý. Agenttiktiń jergilikti jerlerde departamentteri bolýy tıis. Ekinshi usynys - óńir ákimdikteri janynan otbasy isteri jónindegi basqarma qurýdy usyndyq. Bizde QR Aqparat jáne qoǵamdyq damý mınıstrliginde jastar jáne otbasy isteri jónindegi komıtet bar. Biraq komıtettiń aımaqtarda basqarmasy joq. Osy oraıda qıyn jaǵdaıǵa tap bolǵan otbasylardy anyqtap, olarǵa qoldaý kórsetetin, jalpy otbasylyq saıasatty júzege asyrý boıynsha óńirlermen baılanys joq. Úshinshi usynys - otbasy máselesin Aqparat jáne qoǵamdyq damý mınıstrliginiń quzyretinen shyǵaryp, ol fýnktsııany Eńbek jáne halyqty áleýmettik qorǵaý mınıstrliginiń jaýapkershiligine berý usynyldy. Osylaısha otbasy máselelerin sheshýde birtutas júıe qurý úshin jergilikti jerlerdegi áleýmettik qorǵaý basqarmalarynyń fýnktsıonaldyǵyn keńeıtý kerek», - deıdi Dınara Zákıeva.

Buǵan deıin Májilis depýtaty elimizde otbasyndaǵy janjaldyń 80% ishimdikpen baılanysty ekendigin alǵa tartty.