Otbasy banki alǵashqy jarnany 50%-dan 30%-ǵa deıin tómendetpek
Bul týraly Óńirlik kommýnıkatsııalar qyzmeti alańynda ótken baspasóz máslıhaty barysynda «Otbasy bank» AQ Almaty qalalyq fılıalynyń dırektory Danagúl Túsipova málim etti, dep habarlaıdy QazAqparat tilshisi.
«Jyl basynan beri Otbasy bank qyzmetkerleri 8400 zaem berdi. Demek, kúnine 150-160 adam qoljetimdi nesıege ótinish berip, qonys toıyn toılaıdy. Berilgen nesıeniń tórtten biri Almatynyń úlesine tıesili. Sonymen qatar, qala turǵyndary jınaqtaý jáne odan ári turǵyn úı satyp alý úshin kún saıyn 100-den astam jańa depozıt ashady. Alaıda, onyń bári memlekettik baǵdarlamalardyń sharttaryna sáıkes kelmeıdi. Sol sebepti, bizdiń ınvestorlarymyzdyń kópshiligi turǵyn úıdi kommertsııalyq naryqtan satyp alady. Qazir biz qurylys salýshylarmen birge jańa mehanızm ázirleýdemiz, onyń basty qundylyǵy bastapqy jarnany 50%-dan 30%-ǵa deıin tómendetý. Qurylys kompanııalarynan bólingen sýbsıdııalar ony azaıtýǵa múmkindik berip otyr», – dep túsindirdi «Otbasy bank» Almaty qalasy boıynsha fılıalynyń dırektory Danagúl Túsipova.
Aıtýynsha, Almatyda osy ádis boıynsha Otbasy bank klıentterine qalanyń 10 turǵyn úı keshenindegi 850 páter usynylady. Turǵyndar ózderine unaıtyn nysandy tańdap, «Baspana Market» portalynda nemese bank bólimshesinde páter brondatyp, nesıege ótinish bere alady.
Sondaı-aq, Otbasy bank qazaqstandyq kásiporyndarmen birge taǵy bir ónim – «Korporatıvti» baǵdarlamasyn iske asyrýda. Onyń aıasynda kompanııa óz qyzmetkerleriniń baspana máselesin sheshýge kómektesedi.
«Osy yntymaqtastyq aıasynda nesıe mólsherlemesi 7%-dan 8,5%-ǵa deıin (JTSM 7,4%-dan) bolady. Bul rette kompanııa óz qyzmetkeri úshin bastapqy jarnanyń bir bóligin jınaqtaýǵa kómektesedi. Ol 20% nemese tipti 30% bolýy múmkin. Kompanııanyń mundaı qoldaýy jeke baspanaǵa aparar joldy aıtarlyqtaı qysqartady, ıaǵnı jaqyn arada qonys toıyn toılaýǵa kómektesedi. Bul Otbasy bankiniń «Korporatıvtik» ónimi kásiporyndarǵa óz qyzmetkerleriniń baspana máselesin jyldam sheshýge múmkindik beredi. Al bul áleýmettik paketti nyǵaıtyp, qundy kadrlardy ustap qalýdyń bir joly. Búgingi kúni «Korporatıvtik» ónimniń kómegimen Qazaqstan boıynsha 1000-ǵa jýyq adam baspana satyp alýǵa múmkindik aldy. Bıyl kezekti qonys toıyn kútip otyrmyz», – dedi spıker.