Otbasy bank klıentteriniń jeke málimetteri jelide jarııalanyp ketkeni ras pa

ASTANA. QazAqparat – Jelide «Otbasy bank» klıentteriniń jeke derekteri jarııalandy jáne banktiń IT júıesinde irkilis boldy degen aqparat taraǵan edi. Osyǵan oraı mekemeniń baspasóz qyzmeti túsinik berdi, dep habarlaıdy QazAqparat tilshisi.

«Bankte klıentterdiń jeke derekteriniń saqtalýy - alǵyshart. Biz jeke derekterdi jáne aqparatty qorǵaý salasyndaǵy zańnamanyń búkil talaptary men normalaryn qatań saqtaımyz. Sáıkesinshe, Otbasy bankindegi derekterdiń syrtqa jarııalanyp ketkeni týraly aqparat shyndyqqa janaspaıdy Sondaı-aq, bankte IT jobalar jumysynda irkilis bolǵan joq. Bank qalypty jumys istep tur. Qazirgi ýaqytta «Otbasy bank» AQ 2023 jylǵa deıingi damý strategııasyn júzege asyryp jatyr», - delingen resmı túsiniktemede.

Strategııanyń maqsaty - bank qyzmetinde aldyńǵy qatarly tehnologııalardy engizý jáne avtomattandyrý arqyly klıentterge qyzmet kórsetý operatsııalaryn 100% onlaın rejımge kóshirý.

«Kez kelgen tekserýdiń qorytyndysy boıynsha akt jasalady. Sondaı-aq, ony oryndaý boıynsha is-sharalar jospary qurylyp, ony oryndaý barysy qadaǵalanady. Tekserý nátıjesi boıynsha jekelegen tapsyrmalardy oryndamaǵan jaǵdaıda qyzmettiń jekelegen salalaryna jetekshilik etetin bank qyzmetkerlerine tártiptik jaýapkershilik qarastyrylýy múmkin»,- deıdi bankten.

Habarlamada aıtylǵandaı, tártiptik jaýapkershilikke tartý týraly sheshimdi banktiń dırektorlar keńesi qabyldaıdy.

Sondaı-aq, atalǵan bank qazir «Aýdıtorlyq baqylaý týraly» zańdy iske asyrý boıynsha is-sharalardyń oryndalyp jatqanyn habarlap otyr.