Otbasy, áıelder, balalar jáne jastar isteri jónindegi ýákiletti organ qurylýy múmkin

ASTANA. QazAqparat – Elimizde Otbasy, áıelder, balalar jáne jastar isteri jónindegi ýákiletti organ qurylýy múmkin. Bul jaıynda Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta Qazaqstan Úkimeti otbasylardy, áıelderdi, balalar men jastardy qoldaý boıynsha josparly jumys júrgizýde. Ortalyq deńgeıde memlekettik otbasylyq jáne jastar saıasatyn iske asyrý jónindegi fýnktsııalar Aqparat jáne qoǵamdyq damý mınıstrliginiń Jastar jáne otbasy isteri komıtetine júktelgen. Komıtet otbasy saıasaty salasynda memlekettik saıasatty qalyptastyrý boıynsha jumys júrgizedi. Memlekettik otbasy saıasaty salasynda salaaralyq úılestirý; ortalyq, jergilikti atqarýshy organdar men ózge de sýbektilerdiń otbasylyq saıasat máseleleri boıynsha qyzmetin úılestirý; otbasy saıasaty salasyndaǵy normatıvtik quqyqtyq aktilerge quqyqtyq monıtorıngti júzege asyrý boıynsha jumystardy júzege asyrady», - dep atap ótedi Úkimet basshysy.

Premer-Mınıstrdiń atap ótýinshe, balalardyń quqyqtary men ál-aýqatyn qorǵaýǵa baǵyttalǵan túrli baǵdarlamalyq qujattar bilim berý salasynda iske asyrylatyndyǵyna baılanysty Oqý-aǵartý mınıstrliginde Balalardyń quqyqtaryn qorǵaý komıteti jumys isteıdi. Onyń mindetterine bala quqyqtaryn qorǵaý salasyndaǵy memlekettik saıasatty iske asyrý, balalardyń quqyqtary men zańdy múddelerin qorǵaýdy qamtamasyz etý, olardy kemsitýge jol bermeý jáne balalardyń quqyqtary men zańdy múddeleriniń negizgi kepildikterin nyǵaıtý, sondaı-aq buzýshylyqtar bolǵan jaǵdaıda olardyń quqyqtaryn qalpyna keltirý kiredi.

«Balalardyń quqyqtaryn qorǵaý komıteti bilim berý salasynda balalardyń quqyqtarynyń saqtalýyna monıtorıng jáne baqylaý júrgizedi. Onyń ishinde erte kezeńderde buzýshylyqtar men problemalar anyqtalady jáne olardy joıý boıynsha sharalar qabyldanady. Balalardy bilim berý protsesine ıntegratsııalaý jáne taǵy basqalary qamtamasyz etiledi. Sondaı-aq, Eńbek jáne halyqty áleýmettik qorǵaý mınıstrligi óz quzyreti aıasynda azamattardy áleýmettik qorǵaý jáne arnaýly áleýmettik qyzmetter kórsetý boıynsha keshendi jumys júrgizýde. Sizdiń usynystaryńyzdy eskere otyryp, otbasy, áıelder, balalar jáne jastar máseleleri jónindegi bir ýákiletti organdy naqtylaý máselesi pysyqtalýda. Egjeı-tegjeıli qarastyryp, sheshim qabyldanǵannan keıin qosymsha aqparat joldanatyn bolady», - dedi Álıhan Smaıylov.