Otbasynyń tsıfrlyq kartasynda Qazaqstannyń 20 mln azamaty týraly aqparat jınaqtalǵan

<p>ASTANA. KAZINFORM &mdash; Otbasynyń tsıfrlyq kartasy arqyly jyl basynan bastap 202 myńnan astam adamǵa memlekettik qyzmet kórsetildi. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti málim etti.</p>

Otbasynyń tsıfrlyq kartasyn (budan ári — OTsK) engizýdiń nátıjesinde 2024 jyl bastalǵaly 464,4 myńnan astam adamǵa memlekettik qyzmetterdi proaktıvti kórsetý úshin SMS-habarlama joldandy. Bul rette ótinish berýsiz járdemaqy nemese tólem alý múmkindigin 202,4 myń adam paıdalandy.

Otbasynyń tsıfrlyq kartasy memlekettik organdardyń qoldanystaǵy barlyq aqparattyq júıeleriniń derekteri negizinde qalyptastyrylady. Búgingi kúnde onda Qazaqstannyń 20 mln azamaty nemese 6 mln-nan astam otbasy týraly aqparat jınaqtalǵan.

OTsK engizýdiń basty maqsaty — qazaqstandyqtardyń memlekettik qoldaý júıesine teń qoljetimdiligin qamtamasyz etý. Osyǵan baılanysty QR Áleýmettik kodeksinde Otbasynyń tsıfrlyq kartasy áleýmettik saıasattyń orta jáne uzaq merzimdi mindetteri men baǵyttaryn aıqyndaý quraly retinde belgilengen. Sondaı-aq, OTsK azamattardyń áleýmettik mártebesine baılanysty kepildendirilgen memlekettik qoldaýdyń qandaı da bir túrin alýǵa quqyqtary týraly kúndelikti «elektrondyq habarlama» bolyp tabylady.

Qazirgi ýaqytta OTsK memlekettik qoldaý sharalaryn alýǵa quqyǵy bar qazaqstandyqtarǵa qandaı da bir ótinishtersiz járdemaqylar men áleýmettik tólemderdiń 10 túrin resimdeýge múmkindik beredi. Olar eńbek etý qabiletinen aıyrylǵan jaǵdaıda tólenetin áleýmettik tólem; jumysynan aıyrylǵan jaǵdaıda tólenetin áleýmettik tólem, asyraýshysynan aıyrylý boıynsha tólenetin áleýmettik tólem nemese járdemaqy, múgedektigi bar balany tárbıelep otyrǵan ata-anasyna (qamqorshysyna) járdemaqy, múgedektigi boıynsha járdemaqy, kópbalaly otbasylarǵa beriletin járdemaqy, «Altyn alqa» jáne «Kúmis alqa» alqalarymen marapattalǵan kópbalaly analarǵa beriletin járdemaqy, ataýly áleýmettik kómek, sondaı-aq jerleýge arnalǵan birjolǵy tólem.

Sondaı-aq, OTsK arqyly zeınetaqy tólemderin alý múmkindigi, «qandas» mártebesi berilgende nemese uzartylǵanda mártebeniń aıaqtalý merzimi jáne jumyssyz adamdar úshin jumyspen qamtý sharalary týraly avtomatty habarlamalar iske asyryldy.

— Memlekettik qoldaý sharalaryn alýǵa quqyq belgilengen kezde áleýetti alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. Ótinishti resimdeý jáne áleýmettik járdemaqy nemese tólem taǵaıyndaý avtomatty rejımde júrgiziledi, sodan keıin aqsha qarajaty alýshynyń bank shotyna aýdarylady, — delingen mınıstrlik taratqan habarlamada.

Alaıaqtyq táýekelin boldyrmaý maqsatynda 1414 biryńǵaı baılanys ortalyǵynan kelip túsken SMS-ke jaýap berý qajettigin atap ótemiz.

Buǵan deıin eńbek naryǵynda qaı mamandyqtarǵa suranys joǵary ekeni anyqtaldy.