Otbasyndaǵy janjalǵa tili uzyn áıelder de sebep bolyp jatady — depýtat

<p>ASTANA. KAZINFORM — Búgin Parlament Májilisinde áıel quqyqtaryna qatysty zań jobasynyń tanystyrylymynda Májilis depýtaty Anas Baqqojaev otbasyndaǵy janjalǵa tek erlerdi aıyptaýǵa bolmaıtynyn aıtty.</p>

Depýtat qujat boıynsha uryp-soǵý jáne densaýlyqqa jeńil zııan keltirýdi qazirgi ákimshilik jaýapkershilikten qylmystyq jaýapkershilikke aýystyrý jáne jazasyn áldeqaıda qatańdatý normalaryn qoldaıtynyn aıtty. 

«Erkektiń eń sorlysy ǵana áıelge qol kóteredi. Degenmen, urystyń bári birden urýdan shyqpaıdy ǵoı. Erlerdi de túsinýimiz kerek. Janjal neden týyndaıdy? Árıne, keı jaǵdaıda áıeldiń tiliniń uzyn bolýynan. Meni (osy sózim úshin) áıel adamdar keshirsin. Biraq ondaı da faktiler bar. Qazaqta «jaqsy áıel yrys, jaman áıel urys» nemese «erge jaqqan áıel elge de jaǵady» degen sóz bar. Biz qazaqy tárbıeden alshaqtap bara jatyrmyz. Bul rette Oqý-aǵartý vıtse-mınıstrine suraq qoımaqpyn. Qazir oqý oryndarynda qyz balalardy ınabattylyqqa tárbıeleıtin qandaı sabaqtar ótkizilip jatyr? Yntalandyrý sharalary bar ma?» — dep surady Anas Baqqojaev.

Óz kezeginde Oqý-aǵartý vıtse-mınıstri Edil Ospan elimizde ulttyq tárbıeni, mádenıetti oqytý tıisti pánderde qamtylǵanyn aıtty.

«Ásirese, qazaq ádebıeti men tarıh páninde keńinen qamtylǵan. Ulttyq quryltaıda aıtylǵan tapsyrmalar aıasynda oqý jylynan bastap tárbıe komponenti kúsheıtildi. Tárbıe baǵdarlamasyn engizip otyrmyz», — dedi ol.

Budan buryn habarlanǵandaı, búgin Májiliste «Keıbir zańnamalyq aktilerge áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasy tanystyryldy.