Otbasymmen birge óz tańdaýymdy jasadym — energetıka ardageri Vıktor Grafkın

<p>ORAL. KAZINFORM — Oral qalasyndaǵy Oqýshylar saraıynda ornalasqan № 303 referendým ýchaskesinde energetıka salasynyń ardageri Vıktor Grafkın otbasymen kelip, daýys berdi. Osyǵan oraı Kazinform tilshisi V.Grafkınmen tildesken edi.</p>

— Vıktor Vladımırovıch, referendým ýchaskesine qandaı kóńil-kúıde keldińiz?

— Kóńil-kúı oıdaǵydaı. Búgin osynda jubaıym Valentına Nıkolaevna jáne ulym Andreımen birge kelip, óz tańdaýymdy jasadym. Búgin barsha qazaqstandyqtar úshin mańyzdy kún der edim. Árkez óz pikirińdi nyq bildirip, durys tańdaý jasaýdyń máni zor.

Foto: Ǵaısaǵalı/Kazinform

— Sizdi energetıka salasynyń ardageri retinde jaqsy bilemiz. Osy salaǵa qalaı kelgenińizdi qysqasha aıtyp ótseńiz?

— Men Batys Qazaqstan oblysynyń týmasymyn, aldaǵy jyly toqsan jasqa tolamyn. Sverdlovsk (qazirgi Ekaterınbýrg) qalasyndaǵy Ýral polıtehnıkalyq ınstıtýtyn bitirgennen keıin Oral jylý-elektr ortalyǵynda kezekshi ınjener bolyp eńbek jolyn bastadym. Qalalyq elektr jelisin basqardym, «Batys Qazaqstan óńirlik elektr jelilik kompanııasy» JShS-nyń bas ınjeneri boldym. Jalpy eńbek ótilim — 63 jyl. Jylý-elektr ortalyǵy bastapqyda kómirmen jumys istedi, keıin mazýtqa, sosyn gazǵa aýystyrdyq. Batys Qazaqstan oblysyn elektrlendirý jumystaryna tikeleı atsalystym dep aıta alamyn. Óńirde men barmaǵan aýyl joq deýge bolady.

— Jasyńyz jetpisten asqansha jumys jasaǵan ekensiz. Keıingi jastarǵa ne aıtar edińiz?

— Maman kerek bolǵan soń, jetpisten asqansha eńbek ettim. Kim-kim de óz salasynyń myqty mamany bolǵysy kelse, izdenýden jalyqpaý kerek. Qazirgi zamanda jańa tehnologııalar engizilýde, talap ta basqasha. Sondyqtan budan keıinge qalyp qoımaý úshin bilim-biligińdi úzdiksiz jetildirý qajet.

— Al kadr máselesin qalaı sheshýge bolar edi?

— Qazaqstanda mamandardy jaqsy daıarlaıtyn joǵary oqý oryndary bar. Mine, solardy jandandyryp, durys jolǵa qoısa, maqsatymyzǵa jete alamyz.

— Siz jýyrda «Oral qalasynyń qurmetti azamaty» atandyńyz. Osy oraıda qalanyń qurmetti azamaty retinde oraldyqtarǵa, barsha Qazaqstan halqyna qandaı tilek aıtar edińiz?

— Eń aldymen barlyq adamǵa densaýlyq tiler edim. Aýyrmaı-syrqamaı, keminde júz jasańyzdar! Eń bastysy, aldymyzǵa bıik maqsat qoısaq, alynbaıtyn qamal joq.

— Áńgimeńizge rahmet. Denińiz saý bolyp, uzaq jasańyz!