Otbasy bank jas ǵalymdarǵa páter beretin jańa baǵdarlamany iske qosty
«QR Ǵylym jáne joǵary bilim mınıstrligi men „Otbasy bank“ AQ alǵash ret jas ǵalymdarǵa qoljetimdi kredıt berýdiń birlesken baǵdarlamasyn iske qosty. Bul pılottyq joba Memleket basshysynyń 2023 jylǵy sáýirde Ǵylym jáne tehnologııalar jónindegi ulttyq keńestiń otyrysynda berilgen tapsyrmasyn oryndaý sheńberinde iske asyp jatyr», — dedi QR Ǵylym jáne joǵary bilim vıtse-mınıstri Darhan Ahmet-Zákı Ortalyq kommýnıkatsııalar qyzmetinde ótken baspasóz máslıhatynda.
«Otbasy bank» AQ basqarma tóraǵasy Lázzat Ibragımovanyń aıtýynsha, bul baǵdarlama akademııalyq ǵylymmen aınalysatyn jastarǵa arnalǵan.
«Jas ǵalymdardyń kópshiligi salalyq ǵylymǵa ketip qalady jáne akademııalyq irgeli ǵylymdarǵa jas mamandar jetispeıdi. Osynyń bárin zertteı kele, arnaıy baǵdarlama ázirleýdi uıǵardyq. Ǵylym jáne joǵary bilim mınıstrligine qarasty 53 uıymnyń ǵalymdary ótinim bere alady. Onyń ishinde, Memleket tarıhy ınstıtýty, Matematıka jáne matematıkalyq modeldeý ınstıtýty, Ekonomıka ınstıtýty, A. Baıtursynov atyndaǵy Til bilimi ınstıtýty, Áýezov atyndaǵy Ádebıet jáne óner ınstıtýty, Tarıh jáne etnologııa ınstıtýty j»ne basqalary bar. Bul tizimge Qazaqstannyń joǵary oqý oryndary da engen», — dedi «Otbasy bank» ókili.
Onyń aıtýynsha, baspana nesıesi jyldyq 5% stavkamen eń kemi 10% bastapqy jarnamen beriledi. Beriletin kredıttiń eń kóp somasy — 20 mln teńge, qaryz merzimi — 19 jyl.
«Bul jas ǵalymdarǵa alǵashqy páterin satyp alýǵa, Qazaqstanda qalyp, ǵylymı zertteýlerin jalǵastyrýǵa múmkindik beredi. Aı saıynǵy ıpoteka tólemi qolaıly bolý úshin, alǵashqy 8 jylda tólem 155 myń teńgeden bolsa, odan kıein 84 myń teńgege deıin tómendeıdi. Qazirdiń ózinde buǵan suranys artty. Baǵdarlama aldaǵy 5 jylda júzege asyrylady dep joparlanǵan, „Otbasy banktiń“ kirisinen qarjylandyrylady», — dep túsindirdi L. Ibragımova.
Baspanaǵa muqtaj jas ǵalymdar ǵylymı jobalar men baǵdarlamalarǵa, ǵylymı-tehnıkalyq qyzmet nátıjelerin kommertsııalandyrý jobalaryna qatysyp, magıstr dárejesinen tómen emes jáne ǵylymı-zertteý jumys ótili keminde 3 jyl bolýy qajet.
«Nesıe 40 jasqa deıingi jas ǵalymdarǵa (40 jasty qosa alǵanda) beriledi. Bul jerde eshqandaı kezek joq. Instıtýttyń basshylyǵy óz tarapynan ǵylymmen aınalysatyn jastarǵa joldama berip, Otbasy bankke jiberedi. Olar 20 mln teńgege deıin nesıe alý múmkindigine ıe. Bankte óz tólem qabiletin rastaǵan soń, 3 aıdyń ishinde bastapqy nemese qaıtalama naryqtan ózderi úı izdeıdi. Eń bastysy, úmitkerdiń atynda sońǵy 5 jylda baspana bolmaýy kerek», — dedi «Otbasy bank» AQ ortalyq fılıalynyń dırektory Jansultan Mataı.