Otbasy bank genderlik chempıon dep tanyldy

<p>Otbasy bank (&laquo;Báıterek&raquo; holdınginiń enshiles uıymy) Qazaqstanda genderlik teńdikti belsendi túrde damytýǵa qosqan úlesi úshin Ortalyq Azııa óńirlik ekonomıkalyq yntymaqtastyq (ary qaraı - OAÓEY) baǵdarlamasynyń júldesin elimizde alǵashqylardyń biri bolyp jeńip aldy, dep habarlaıdy <a href="https://www.inform.kz/" target="_blank" rel="noopener">Kazinform.</a></p>

Marapat bankke «Umaı» áıelderdi turǵyn úımen qamtamasyz etý baǵdarlamasyn sátti júzege asyrǵany úshin taǵaıyndaldy. Úsh jyl ishinde bul joba iri qalalarda ǵana emes, sonymen qatar oblys ortalyqtary men shaǵyn qalalarda 3 500-den astam qyz-kelinshektiń baspanaly bolýyna kómektesti. 

– Genderlik teńdik – adam quqyqtarynyń eń mańyzdy bóliginiń biri, ol qoǵamdaǵy beıbitshilik pen kelisimdi qamtamasyz etýde basty ról atqarady. Onyń negizi – ekonomıkalyq teńdik. Sondyqtan Otbasy bank áıelderdiń baspanaly bolýyna barynsha kúsh salyp jatyr», - dedi «Otbasy bank» AQ Basqarma tóraıymy Lázzat Ibragımova.

Lázzat Ibragımova óziniń kásibı mansabynda Qazaqstandaǵy genderlik teńdik ıdeıalaryn belsendi túrde ilgeriletip keledi. Osylaısha, onyń jetekshiligimen «Damý» qory Eýropalyq Qaıta Qurý jáne Damý Bankiniń (EQDB) qarajaty esebinen áıelder kásipkerligi sýbektilerin qoldaý sharasy sheńberinde Ortalyq Azııadaǵy alǵashqy nesıelik jelini iske qosty. 2016 jyly EQDB basshysy Sýma Chakrabartı genderlik teńdikti damytýǵa qosqan úlesi úshin Lázzat Ibragımovany marapattady. 

Foto: www.carecprogram.org

Otbasy bankiniń «Umaı» baǵdarlamasy qyzmettiń túrli salasyndaǵy jáne tabysy ártúrli áıelderdiń baspana máselesin sheshýge kómektesti. 

– ESG-qaǵıdattaryn ustaný, qoǵam men qorshaǵan ortanyń ıgiligi úshin odan ári turaqty damýdy qamtamasyz etý úshin, Otbasy bankiniń strategııalyq tańdaýy bolyp tabylady. Sondyqtan bank «jasyl qarjylandyrý», genderlik teńdik, sondaı-aq jastardy qoldaý máseleleri boıynsha óz ustanymdaryna berik, - dep tolyqtyrdy «Otbasy bank» AQ Josparlaý jáne strategııalyq taldaý departamentiniń dırektory Alena Fınogenova. 

OAÓEY – bul 11 eldiń (Aýǵanstan, Mońǵolııa, Ázerbaıjan, Pákistan, Qytaı, Tájikstan, Qazaqstan, Túrikmenstan, Qyrǵyz Respýblıkasy, Ózbekstan) jáne damý boıynsha seriktesteriniń (Azııa damý banki, Eýropalyq qaıta qurý jáne damý banki, Halyqaralyq valıýta qory, Islam damý banki, BUU damý baǵdarlamasy, Dúnıejúzilik bank jáne Azııalyq ınfraqurylymdyq ınvestıtsııalar banki) ekonomıkalyq ósýdi arttyrýǵa jáne kedeıshilikti azaıtýǵa baǵyttalǵan seriktestigi. 

Aıta keteıik, OAÓEY syılyǵy qoǵamǵa eleýli úles qosqan kóshbasshylarǵa beriledi.