Otaý qurý eshqashan kesh emes: SQO-da bıyl 81-degi ata úılenip, 82 jastaǵy ájeı kúıeýge shyqqan

PETROPAVL. QazAqparat – Soltústik Qazaqstan oblysynda bıyl 845 jup shańyraq kóterdi. Jyl basynan beri 228 jup ajyrasyp ketti, dep habarlaıdy QazAqparat tilshisi.

SQO ádilet departamenti baspasóz qyzmetiniń málimetinshe, bıyl shańyraq kótergen segiz juptyń jasy neke jasynan, ıaǵnı 18-den tómen bolǵan.

Boıjetkenniń júkti bolýyna baılanysty olardyń nekesi tirkeldi.

Shetel azamattarymen jyl basynan beri 60 neke tirkeldi. Byltyr mamandar osyndaı 210 jupqa qujat bergen.

Byltyr oblysta 729 jup ajyrassa, bıyl olardyń sany – 228.

«Bıyl ajyrasyp jatqan erlerdiń ortasha jasy 41 bolsa, áıelderde – 38. Byltyr shańyraǵy ortasyna túsken er adamdardyń ortasha jasy 33, kelinshekterde 32 boldy. Al úılengenderdiń ortasha jasyna keletin bolsaq, er adamdarda 34, áıelderde 32 jas. Búginde jastar shańyraq kóterýge asyqpaıtyn bolǵan. Máselen, osydan 10 jyl buryn jigitter 29-da úılense, qyzdar 27 jasynda turmys qurǵan», - deıdi SQO ádilet departamentiniń bas mamany Emılııa Zýevıch.

Bıyl otaý quryp, nekesin tirketkenderdiń eń egde jastaǵysy – 82-de. Áıel adam turmys qurdy, al 81 jastaǵy er adam úılengen.

«Shetel azamattarynyń ishinde óńir turǵyndary negizinen reseıliktermen nekege otyrady. Sonyń ishinde kórshi memleketten qalyńdyq ákeletin er adamdardyń úlesi joǵary. Al ajyrasýǵa sebepter ártúrli, negizgilerine toqtalar bolsam – minezdiń jaraspaýy, spırttik ishimdikterge beıim bolý, erli-zaıyptylardyń opasyzdyǵy. Bir jaǵdaıda egde jastaǵy erli-zaıypty ortaq kelisimge kele almaı ajyrasyp ketti, áıeli qalada balalarymen turǵysy kelgen, kúıeýi aýyldan kóshýge bas tartqan. Al jastardyń arasynda ajyrasýǵa ákelgen erekshe sebep – áıeli kúıeýin «Alfons» dep kórsetken», - deıdi Emılııa Zýevıch.