«Otardaǵy» jaýyngerlik paradqa 3 myńnan astam sarbaz qatysady

ASTANA. QazAqparat - Jambyl oblysyndaǵy «Otar» 40-shy áskerı bazasynyń aýmaǵynda jaýyngerlik paradqa daıyndyq jalǵasyp jatyr. Kún saıyn polıgonda jattyǵýlar ótkizilip, onyń barasynda paradtyń barlyq kezeńderi pysyqtalýda. Bul týraly «Ońtústik» óńirlik qolbasshylyǵynyń baspasóz qyzmeti málim etti, dep habarlaıdy QazAqparat tilshisi.

«Áskerı paradqa qatysýshylardyń basym bóligin «Ońtústik» óńirlik qolbasshylyǵynyń  áskerı qyzmetshileri qamtyp otyr. Jalpy bul ataýly sharaǵa úsh myńnan astam sarbaz, 300-den astam qarýlaný ári áskerı tehnıkasy, 30-ǵa jýyq avıatsııa tehnıkasy qatysady», - dep atap ótilgen habarlamada.

Atalǵan paradqa qatysý keń aýqymdy oqý-jattyǵýdy ótkizýmen teń. Bólimsheler tájirıbelik jattyǵý kezinde ózara is-qımyldy egjeı-tegjeıli pysyqtalýy tıis. Al ofıtserler parad kezeńderin josparlaý men bólimshelerdi basqarý barysynda áskerı ónerdi joǵary deńgeıde kórsetýi qajet.

Qazaqstan tarıhynda alǵashqy jaýyngerlik parad 5 jyl buryn, ıaǵnı 2013 jyly Otan qorǵaýshylar  kúninde uıymdastyryldy. Jaýyngerlik parad Qarýly Kúshterdiń negizgi qarýlanýynyń múmkindikterin kórsetýge arnalǵan.
 

Áskerı paradpen aıyrmashylyǵyna toqtalsaq, jaýyngerlik parad kezinde áskerı tehnıka tájirıbe júzinde paıdalanylady. Polıgonda qurlyq áskerleriniń túrli qarýlarynan oq atylady, al ushaqtar men tikushaqtar áýede ózderiniń tolyq múmkindikterin kórsetedi.

Sonymen qatar, jeke quram ózderiniń kásibı deńgeıin tolyqtaı pash etip, jaýyngerlerdiń tájirıbe júzindegi daǵdylaryn tamashalaýǵa múmkindik jasalady.