Otarda komaǵa túsken sarbaz aýrýhanadan shyqty
«Bul úlken jeńis ári qýanyshty jańalyq. Ábdilpat Nurjigit mine aýrýhanadan shyqty. Biz sarbazdyń saýyǵyp ketýin el bolyp tiledik. Birinshi kezekte ata-anasy úshin teńdessiz qýanysh. Osy oraıda QR Qorǵanys mınıstrliginiń Áskerı gospıtali dárigerleriniń úlesi kóp ekenin aıtqan jón. Sondaı-aq dáriger Áıgerim Muratqyzyna aıtar alǵys zor. Ólimge arasha túsken naǵyz kásibı mamandar», — dep jazdy depýtat paraqshasyna.
Eske sala keteıik, buǵan deıin sarbaz esin jıǵanda ákesi Tımýr Janalın óziniń Instagram-daǵy paraqshasynda jazba qaldyryp, tileýles bolǵan barsha qazaqstandyqtarǵa alǵysyn aıtqan bolatyn.
«Uzaq ýaqyt boıy bizge jan-jaqty qoldaý kórsetip, ulymyz úshin duǵa etkenderdiń bárine taǵy da alǵysymyzdy bildirgimiz keledi. Biz sizderge ulymyzdyń komadan shyqqany týraly qýanyshty jańalyqty jetkizýge asyqpyz. Qazir dárigerler aıtqandaı, ol sańyraý kúıde. Bizdi tanıdy, buryn jasalǵan traheostomııaǵa baılanysty áli sóıleı almaıdy. Biraq jaǵdaıy aýyr, dıalız jasalady. Ol shamamen 6-8 saǵatty alady. Dárigerler qoldan kelgenniń bárin jasap jatyr. Sol úshin olarǵa alǵys aıtamyz», - degen edi Tımýr Janalın.
Al, bul joly sarbazdyń anasy alǵysyn bildirdi.
«Balamdy aıaqqa turǵyzýǵa kómektesken dárigerlerge alǵysym sheksiz. Balam osylaı tez arada jazylyp ketedi dep oılaǵan joqpyn. Sondyqtan qýanyshymdy shek joq», — dedi Nurjigittiń anasy Janna Janalına.
Nurjigit te óziniń saýyǵyp ketýine tilektes bolǵan barsha qazaqstandyqqa alǵysyn bildirdi.
«Sizderdiń qoldaýlaryńyzdyń arqasynda saýyǵyp shyqtym», — dedi ol.
Aıta keteıik, Jambyl oblysynda sarbaz jansaqtaý bólimine túsken edi. Oqıǵa 9 maýsym kúni bolǵan. Jambyl oblystyq densaýlyq saqtaý basqarmasy baspasóz qyzmeti sarbazdyń jaǵdaıy aýyr ekenin málimdegen.
«Naýqas 9 maýsym kúni Gvardeısk áskerı gospıtalinen jedel járdem kóligimen jetkizildi. Qordaı ortalyq aýdandyq aýrýhanasyna «polısegmentaldy pnevmonııa» dıagnozymen jatqyzyldy. Oń jaqta plevrıt. 3-4 dárejeli juqpaly toksıkalyq shok. Sepsıs. Mıdyń gıpoksııalyq isinýi, tserebraldy koma 2-3. DVS sındromy. Naýqas klınıkalyq ólimdi bastan keshken. Qazirgi ýaqytta naýqastyń jaǵdaıy óte aýyr, kóptegen músheler jetkiliksizdigi baıqalady. Atap aıtqanda, tynys alý, júrek, baýyr, tserebraldy jáne ınfektsııalyq toksıkalyq shok belgileri bar. Gemofıltratsııa jáne dári-dármekpen emdeledi», - dep jazǵan edi sol tusta.
Prezıdent qoǵamdyq rezonans týdyrǵan bul máseleni zerttep, kináli adamdardy jazalaýdy talap etken edi.
Artynsha Qorǵanys mınıstrligi Jambyl oblysy Gvardeısk garnızonynda aýrýhanada jatqan sarbazdyń jaǵdaıyna oraı resmı málimdeme jasaǵan bolatyn.