Otanym – amanatym: Elordadaǵy kontsertte óner juldyzdary án shyrqap jatyr

ASTANA. QazAqparat – Astanada búgingi merekege oraı otandyq ánshilerdiń qatysýymen kontsert ótip jatyr, dep habarlaıdy QazAqparat tilshisi.

«Otanym – amanatym» atty merekelik shara «Báıterek» monýmenti alańynda uıymdastyryldy. Kórý tegin jáne ol 3 saǵatqa sozylady.

Sahnada «Zaman» toby, Erkesh Hasen, Ibragım Eskendir, Ǵadilbek Janaı, Ayree, Qanay jáne taǵy basqa birqatar ánshiler óner kórsetip jatyr.

Sonymen qatar, Qazaqstan Respýblıkasynyń Memlekettik kúzet qyzmeti aıryqsha maqsattaǵy kúshterdiń sarbazdary jáne Qazaqstan Respýblıkasy Qarýly Kúshteri ulttyq áskerı-patrıottyq ortalyǵynyń, ortalyq áskerı úrmeli aspaptar orkestriniń ónerin tamashalaýǵa bolady.

«Tańerteńnen beri «Báıterek» monýmenti alańynda balalarǵa arnalǵan ınteraktıvti jáne sporttyq oıyndar uıymdastyryldy. Oǵan anımatorlar, uzynaıaqty qýyrshaqtar qatysty. Al qazir óner juldyzdary men ulttyq áskerı-patrıottyq ortalyqtyń áskerı úrmeli orkestri, sondaı-aq memlekettik kúzet qyzmetiniń arnaıy maqsattaǵy kúshteriniń áskerı qyzmetshileri ashatyn kontsert ótip jatyr, - deıdi qalalyq mádenıet basqarmasy basshysynyń orynbasary Nuran Qamzın.

Sonymen qatar kelýshilerge arnap jármeńke uıymdastyrylǵan.

Іs-sharanyń qaýipsiz ótýin polıtseıler men tótenshe jaǵdaı mamandary qadaǵalap júr.

Aıta keteıik, 7 mamyr - Otan qorǵaýshy merekesine oraı búgin elordada birqatar mádenı is-shara ótti.

Sonyń biri EKSPO alańynda ashyq aspan astynda merekelik kontsert ótkenin aıtqan edik.

Sharany Ázirbaıjan Mámbetov atyndaǵy memlekettik drama jáne komedııa teatry uıymdastyrdy.