Otandyq serıal óndirýshilerge salyq jaǵynan jeńildik berile me – Dáýren Abaevtyń jaýaby

NUR-SULTAN. QazAqparat – Aqparat jáne qoǵamdyq damý mınıstri Dáýren Abaev sapaly ónim shyǵarý úshin otandyq serıal óndirýshilermen qandaı jumystar júrgizilip jatqanyn aıtyp berdi, dep habarlaıdy QazAqparat tilshisi.

«Otandyq serıal óndirý, túsirý salasyna qarap otyrsaq, biz shynynda da, kúrdeli jolmen júrýdi bastap ketippiz. Otandyq prodıýsserlik kompanııalar sapaly serıal túsire bastaýy úshin barynsha qoldaý bildirdik. Saıyp kelgende, eń ońaı jol – daıyn ónimdi satyp alyp, translıatsııalaý. Al sonshalyqty úlken sanalmaıtyn 18 mıllıon adamy bar memlekette bul baǵyttaǵy naryqty damytý – ózin-ózin aqtaı bermeıtin ónim. Al bizdiń jaǵdaıda memleket otandyq óndirýshilerdi qoldaýdy sheshti. Biz shynynda da, barlyq jaǵdaıdy jasap berdik. Ekinshi jaǵynan, bul mehanızm jumys isteı bastaǵanda qandaı máselelerdi sheshý kerektigi de aıqyndala bastady. Máselen, qazir bizge qymbat serıaldardy túsirý qıynǵa túsip tur. Sebebi, biz tarıftik kestege qaraımyz. Al bizge negizinen smetalyq sıpatqa mańyz bergen abzal», - dedi Dáýren Abaev elordada ótip jatqan Astana Media Week sharasynda.

Mınıstrdiń aıtýynsha, belgili bir prodıýsserge aqshany bere salyp, tarıhı serıal túsir deý asa oń jambasqa kele bermeıtin ádis.

«Biz serıal túsirilimine qajetti somaǵa qaraýymyz kerek. Bul baǵytta úlken jumys júrgizemiz degen oıdamyz», - dedi ol.

Sonymen birge, Dáýren Abaev shara barysynda «Otandyq serıal óndirýshilerge salyq jaǵynan jeńildik berile me?» degen suraqqa jaýap berdi.

«Salyq boıynsha barlyq suraqtardy qazirdiń ózinde taldap jatyrmyz. Meniń oıymsha, jyldyń sońyna deıin bul baǵyttaǵy jaǵymdy jańalyqtar bolady. Tájirıbe kórsetip otyrǵandaı, eger osy ispen aınalyspaǵanda, qosarlana júretin máselelerin de bilmes edik. Jumys júrgize bastaǵanda qandaı másele baryn uǵyp, olardy sheshe bastadyq», - dedi Dáýren Abaev.

Eske sala ketsek, elordadaǵy «Qazmedıa» ortalyǵynda úsh kúnge sozylatyn Ortalyq Azııadaǵy eń iri medıa-oqıǵa — Astana Media Week ótip jatyr. Astana Media Week-tiń birinshi kúni serıaldyq ónimderdi ázirleý jáne shyǵarý taqyrybymen jáne salyq preferentsııalary, kıno prokatynyń sharttary, mazmuny, fılm óniminiń shyǵarmashylyq deńgeıi jáne onyń demeýshiler úshin tartymdylyǵy taqyrybymen erekshelenedi.