Otandyq munaı-gaz salasynda Qoǵamdyq reıtıng bıýrosy qurylady

ASTANA. 7 jeltoqsan. QazAqparat /Arman Asqarov/ - Búgingi tańda otandyq munaı-gaz salasyndaǵy jumysty sapaly deńgeıge shyǵarý úshin Qoǵamdyq reıtıng bıýrosyn qurý qajet. Búgin qazaqstandyq mólsherdi damytý jáne kásipkerlikti qoldaý jónindegi Úılestirý keńesiniń otyrysynda keńes tóraǵasy, «Qazaqstandyq munaı-gaz ınstıtýty» AQ dırektory Uzaqbaı Qarabalın osyndaı usynys jasady.

Onyń aıtýynsha, «Qazenerdjı» qaýymdastyǵy negizinde qurylatyn atalǵan bıýro otandyq munaı-gaz salasyndaǵy oryndaýshy kompanııalardyń óndiristik áleýetin kórsetip qana qoımaı, olardyń arasyndaǵy báskelestikti kúsheıtip, qyzmeti sapaly ári kásibı tájirıbesi bar óndirýshilerdi anyqtaýǵa múmkindik beredi. «Qoǵamdyq reıtıng bıýrosynyń barlyq aqparatyn «Qazenerdjı» qaýymdastyǵynyń resmı saıtyna shyǵarý usynylyp otyr. Ol arqyly munaı-gaz salasyndaǵy tapsyrys berýshi oryndar ózderine kásibı-materıaldyq áleýeti joǵary kompanııalardy tańdaı alady. Al, eń bastysy, biz Qoǵamdyq reıtıng bıýrosy arqyly búgingi oryndaýshy kompanııalardyń áleýetine naqty ári ashyq baǵa bere alamyz», - deıdi U.Qarabalın.

Keńes tóraǵasy atap kórsetkendeı, Qoǵamdyq reıtıng bıýrosy kompanııalardyń kásibı daıyndyǵy, kadrlyq áleýeti, qarjylyq qoryna, sertıfıkattardyń sanyna, áriptestik baılanystaryna jáne tapsyrys berýshilerdiń pikirlerine basa nazar aýdaratyn bolady.

Aıta keteıik, qazaqstandyq mólsherdi damytý jáne kásipkerlikti qoldaý jónindegi Úılestirý keńesiniń búgingi otyrysynda Qoǵamdyq reıtıng bıýrosyn qurý jónindegi usynysty talqylap, qabyldaý josparlanyp otyr.