Otandyq mashına jasaý salasyn ımportqa táýeldilik shektep otyr – mınıstrlik

ASTANA. QazAqparat – Mashına jasaý áleýetin damytýǵa birneshe mańyzdy faktor kedergi bolyp otyr. Ashyq NQA portalynda jarııalanǵan mashına jasaý salasyn damytýdyń 4 jyldyq keshendi josparynda osylaı kórsetilgen, dep habarlaıdy QazAqparat tilshisi.

«Mashına jasaý áleýetin damytý, salanyń ishki jáne syrtqy naryqtarynda otandyq óndirýshilerdiń básekege qabilettiligin arttyrý birneshe faktormen shekteledi. Salada mashına jasaý ónimderi óndirisiniń jyl saıynǵy jalpy ósýi aıasynda ımportqa aıtarlyqtaı táýeldilik saqtalýda», - delingen Indýstrııa jáne ınfroqurylymdyq damý mınıstrliginiń taldaý derekterinde.

Búginde mashına jasaıtyn otandyq kásiporyndar ishki naryqtyń tek 20 paıyzyn ǵana qamtyp otyr.

«Ulttyq statıstıka bıýrosynyń dereginshe, elimizdiń barlyq ımportynyń shamamen 40%-y mashına jasaý ónimderi. Qazaqstannyń mashına jasaýdyń ishki naryǵy otandyq óndirispen nebári 20% qamtamasyz etiledi», - dep másele kóterilgen keshendi josparda.

Buǵan deıin habarlaǵanymyzdaı, Qazaqstandaǵy mashına jasaý salasyn damytýdyń 2024-2028 jyldarǵa arnalǵan keshendi jospary bekitilmek.