Otandyq kondıterler Reseımen nelikten básekelese almaı jatyr

ALMATY. QazAqparat - Búgin Almatyda qazaqstandyq kondıterlerdiń alǵashqy forýmy ótti. Jıyn barysynda atalmysh saladaǵy ózekti máseleler talqylandy, dep habarlaıdy QazAqparat tilshisi.

Qazaqstan kondıterler qaýymdastyǵynyń prezıdenti Álıhan Talǵatbek otandyq óndirýshilerdiń nelikten básekege qabiletsiz ekendigin túsindirdi.

Onyń aıtýynsha, másele ónimniń shıkizattyq quramynda.

«Reseılik vaflılerdiń baǵasy óte arzan. Sebebi, onyń qospasynyń 70 paıyzy  maılardan turady. Mundaı shıkizat arzan keledi. Sondyqtan da taýardyń baǵasy arzan. Biraq ondaı ónimdi jeýge keńes bermeımin. Kóbine maılar adam aǵzasyna zııandy. Al bizdiń otandyq ónimderdiń qospalary 80 paıyz tabıǵı ónimderden, dánderden, shokoladtar men taǵy basqalardan jasalady. Sondyqtan, bizdiń ónimder qymbat keledi. Bizdiń óz satyp alýshylarymyz bar. Biraq arzanǵa da klıent tabylady», - dedi Álıhan Talǵatbek.

Mamannyń aıtýynsha, reseılik óndirýshiler ónimniń syrtqy qorabyna, marketıngke, dızaınǵa kóp aqsha salady.

«Syrtqy oramǵa shyǵyn ájeptáýir ketedi. Máselen, shokoladtardy oraý kerek bolsa, ol qymbatqa túsedi. Al kámpıtterdi oraý úshin juqa qaǵaz jetkilikti degen sııaqty. Syrtqy oram ónim qunynyń 15 paıyzyn alady», - dedi ol.

Júrgizilgen taldaýlarǵa sáıkes, otandyq kondıterlik naryqtyń 49 paıyzyn óz óndirýshilerimiz qamtysa, qalǵany Reseı men Ýkraınanyń enshisinde eken.

Búgingi tańda kondıterlik óndirýshiler 180 myń tonna ónim óndiredi, onyń  60 myń tonnasy syrtqa shyǵarylady. 120 myń tonna ónim Qazaqstanda satylady.