Otandyq kólikterdi Ózbekstanǵa jetkizýge kvota bólý máselesi talqylandy

ASTANA. QazAqparat – Qazaqstan men Ózbekstan úkimetteri Qazaqstanda óndirilgen avtomobılderdi Ózbekstanǵa jetkizýge kvota bólý, qazaqstandyq un tranzıti úshin ózbek tarapynan Aýǵanstanǵa jeńildikter berý múmkindigin qarastyrdy, dep habarlaıdy QazAqparat.

Rrimeminister.kz saıtynda málim etilgendeı, Premer-Mınıstrdiń orynbasary – saýda jáne ıntegratsııa mınıstri Serik Jumanǵarın Ózbekstan Premer-Mınıstriniń orynbasary – ınvestıtsııalar jáne syrtqy saýda mınıstri Jámshıd Hodjaevpen kezdesti.

Taraptar jemis-kókónis ónimderin forvardtyq satyp alý boıynsha tetikterdi jasaý, Qazaqstanda óndirilgen avtomobılderdi Ózbekstanǵa jetkizýge kvota bólý, ózbek tarapynyń Aýǵanstanǵa qazaqstandyq un tranzıtine jeńildikter berý múmkindigi, áýe reısteriniń jıiligin arttyrý jáne basqa da kóptegen baǵyttar boıynsha yntymaqtastyq máselelerin talqylady.

Ekijaqty kezdesý barysynda «Ortalyq Azııa» halyqaralyq ónerkásiptik kooperatsııa ortalyǵyn qurý jobasyna erekshe nazar aýdaryldy. Taraptar jyl sońyna deıin jobany iske asyrýdy bastaý úshin quqyqtyq negizdi qalyptastyrý protsesin aıaqtaýǵa kelisti. Qazirgi ýaqytta áleýetti qazaqstandyq ınvestor halyqaralyq ónerkásiptik kooperatsııa ortalyǵy jobasyna basqarýshy kompanııa retinde qatysýǵa jáne óz qarjylandyrýy esebinen ony iske asyrýǵa belsendi qyzyǵýshylyq tanytyp otyr.

Eske salaıyq, «Ortalyq Azııa» halyqaralyq ónerkásiptik kooperatsııa ortalyǵyn qurý jobasy – aldaǵy 5 jylda Qazaqstan Respýblıkasy men Ózbekstan Respýblıkasy arasyndaǵy taýar aınalymyn 10 mlrd dollarǵa deıin jetkizý boıynsha praktıkalyq is-qımyl josparynyń («Jol kartasy») negizgi elementteriniń biri. Joba uzaq merzimdi. «Ortalyq Azııa» halyqaralyq ónerkásiptik kooperatsııa ortalyǵyn qurý jónindegi birlesken is-sharalar josparyna sáıkes 3 negizgi kezeńdi jáne 20 naqty is-sharany qamtıdy.

Ózbekstan – Qazaqstannyń Ortalyq Azııa óńirindegi negizgi saýda seriktesi. 7 aıdyń qorytyndysy boıynsha ózara saýda-sattyq 26,3% ósti.