Otandyq kıim óndirisin jolǵa qoıý kerek - Nursultan Nazarbaev
«Elimizde shıkizattyq jáne qaıta óńdeý ındýstrııasy bolýy qajet. Bul, memleket turaqtylyǵynyń kepili, ózimizdi qamtamasyz etý úshin kerek. Máselen, biz ekonomıkanyń mańyzdy salasy bolyp sanalatyn jeńil ónerkásipti umyttyq», - dedi Prezıdent.
Ol Almatyda sapaly kostıým tigetin fabrıka bar ekenin eske salyp, zamanaýı áıelder kıimin shyǵarýdy da damytýdy usyndy.
«Qalaıda, jeńil ónerkásibimizdi qalpyna keltirý kerek. Oǵan qajetti maqta, jún, teriniń barlyǵy tabylady. Sapaly jaqsy aıaq kıimder shyǵatynyn da bilemin. Bizdiń áskerimiz ben polıtsııa Qazaqstan ónimderin kıip júr. (...) Bul durys saıasat, ındýstrııany damytýdy qolǵa alamyz», - dep atap ótti N. Nazarbaev.
Aıta keteıik, 2018 jyldyń 5 qazanynda Elbasy Qazaqstan halqyna arnalǵan kezekti Joldaýynda otandyq kásiporyndarǵa halyq kóp tutynatyn taýarlardy shyǵarýǵa kómektesýdi júktedi. Osy oraıda Prezıdent óńdeý ónerkásibi men shıkizatty emes eksportty qoldaýǵa qosymsha 500 mlrd teńge bólip berýdi tapsyrdy. Al Ulttyq bank ekinshi deńgeıli bankterge 600 mlrd teńge bóletin bolady. Ol aqsha otandyq ónimderdi shyǵarý jobalaryna jumsalady.