Otandyq kásiporyndar mektep formasy óndirisin qolǵa aldy

ASTANA. QazAqparat - Qazaqstanda mektep formasy óndirisindegi jergilikti óndirýshiler úlesin arttyrý josparlanyp otyr, dep habarlaıdy QazAqparat tilshisi.

«Jańa jyldan bastap, elimizdegi oqý oryndaryn mektep formasymen qamtamasyz etý úshin kásiporyndar jumysyn arttyrýdy josparlap otyrmyz. Buryndary mektep formasyn shyǵarýmen birneshe kásiporyn ǵana aınalysatyn, mektepter men ata-analar komıteti Túrkııa, Qyrǵyzstan, Qytaıda óndirilgen mektep formalaryn satyp alatyn. Endi otandyq óndirýshiler sapaly ári básekege qabiletti ónim shyǵarýǵa daıyn», - dedi «Atameken» UKP Óńdeý ónerkásibi departamentiniń dırektory Arman Mámbetaev jeńil ónerkásip salasyndaǵy nátıjelerge arnalǵan dóńgelek ústelde.

Onyń aıtýynsha, atalǵan jumys 2017 jyly bastalyp ketken.

«Bul jumys 2017 jyly bastaldy, otandyq óndirýshiler ónimi 1,5 mlrd teńgege satyldy. Biraq, bul jumysty josparly túrde júrgizý qajet, sondyqtan jyl basynan bastap, oblystyq jergilikti atqarý organdarymen, mekteptermen, aýdandyq ákimdiktermen jáne bilim berý basqarmalarymen birlese jumys isteımiz», - dep atap ótti Mámbetaev.