Otandyq kásipkerler prezıdent saılaýyna qatysty pikir bildirdi
Jıyndy bastaǵan basqarma tóraǵasy Abylaı Myrzahmetov Prezıdent úndeýinde eń mańyzdysy - aıqyndyq pen turaqtylyq ekenin málimdedi.
«Qoǵamǵa da, bızneske de aıqyndyq kerek. Joǵarǵy bılik Konstıtýtsııaǵa súıenip, zań negizinde qadam jasady. Prezıdentimiz Elbasymen de, elimizdegi basqa da saıası kúshtermen, parlament, úkimet basshylarymen aqyldasqanyn aıtyp ótti. «Atameken» kásipkerlerdi biriktirip otyrǵan uıym bolǵandyqtan, bızneske eń birinshi turaqtylyq kerek ekenin aıtqym keledi. Kásipker úshin óz bıznesin damytý, eldegi ınvestıtsııalyq ahýaldardyń oń bolýy, ishki bızneske de, syrttan keletin bızneske de eldiń, qoǵamnyń turaqtylyǵy, aýyzbirshiligi kerek» - dedi basqarma tóraǵasy.
Búgingi Prezıdent sheshimi - kásipkerler tarapynan da qoldaý tabatyn týra sheshim. Óz kezeginde óńirdegi bıznes-qaýymdastyq óz pikirimen bólisti.
«Almaty aýyr mashına jasaý zaýyty» AQ bas dırektory Jetpisbaı Edigenov úndeýdiń ýaqytyly qabyldanǵanyn aıtty.
«Óz basym jyldam sheshim qabyldaǵandy jaqsy kóremin. Nege deseńiz, zaýyttyń basshysy bolǵan soń, kez kelgen sharýada naqtylyq qajet. Bıznesti qoldaýǵa baǵyttalǵan sheshimder jalǵasyn taýyp, elimizde, tipti otbasynda turaqtylyqqa demeý bolatynyna senimdimin. Bıznes óz kezeginde saılaýǵa belsendi atsalysýy kerek», - dep oıyn qorytty Jetpisbaı Edigenov.
Shymkent qalasy kásipkerler palatasy óńirlik keńesiniń tóraǵasy, «Otaý Qurylys» holdınginiń basshysy Qaırat Moldaseıitov shymqalanyń kásipkerleri bul sheshimdi biraýyzdan qoldaıtynyn, bul tek bıznes emes, búkil halyq kútip otyrǵan sheshim ekendigin jetkizdi.
Kezekten tys Prezıdent saılaýyn ótkizý sondaı-aq ınvestıtsııalyq klımattyń turaqtylyǵyn qamtamasyz etetinin aıtqan aqtóbelik «Kókjar» agroónerkásiptik taýar-shıkizat bırjasynyń basshysy Esimhan Qurmanǵazın sheteldik ınvestorlar osy tóńireginde oı qozǵaǵanyn da atady.
«Bir-eki kún buryn óńirdegi sheteldik kompanııanyń dırektorymen bolǵan kezdesýde olardyń tarapynan alańdaýshylyq baryn baıqadyq. Árıne, biz bıznes áriptesterimizge bastalǵan ár is jalǵasyn tabatynyn aıttyq. Elde turaqtylyq bolsa, ınvestıtsııalyq klımat da turaqty bolady. Sony bárimiz qalaımyz, qoldaımyz», - dedi Esimhan Qurmanǵazın.
Shyǵys Qazaqstan oblysyndaǵy iri bıznes ókili - «SemAz» JSSh bas dırektory Ásemqan Dosqojanov aqtóbelik áriptesiniń sózin qoldap, kezekten tys Prezıdent saılaýynyń ınvestıtsııalyq klımattyń durys qalyptasyp, jalpy eldiń ekonomıkalyq damýyna úlken áserin tıgizetinin aıtty.
«Atameken» QR UKP óńirlik palata dırektsııalary atynan sóz sóılegen Narıman Ábilshaıyqov bul sheshim eldegi áleýmettik-ekonomkalyq turaqtylyqqa asa qajet ekenin, halyq bolyp saılaýǵa belsendi túrde qatysýǵa daıyn ekenin jetkizdi.
Basqarmanyń keńeıtilgen otyrysynda basqada óńirlerdegi jıynǵa qatysqan kásipkerler biraýyzdan bıznes qashanda naqty ári ashyq sheshimdi tańdaıtynyn, ár jasalǵan qadam bıznestiń damýyna tikeleı áser etetinin, jáne de bul rette kezekten tys Prezıdent saılaýy - durys sheshim ekenin atady.