Otandyq ǵalymdardyń jalaqysy 70%-ǵa kóterildi

ASTANA. QazAqparat – Otandyq ǵalymdardyń jalaqysy 152 myń teńgeden 257 myń teńgege deıin ósti. Bul týraly Ǵylym jáne joǵary bilim mınıstri Saıasat Nurbek málim etti, dep habarlaıdy QazAqparat vedomstvonyń baspasóz qyzmetine silteme jasap.

Osyǵan deıin ǵalymdardyń jalaqysy turaqty bolmady jáne konkýrstardyń nátıjelerine baılanysty edi. Endi olar granttyq jáne baǵdarlamalyq-nysanaly qarjylandyrýǵa arnalǵan konkýrstyq rásimderge qaramastan turaqty eńbekaqy alatyn bolady.

Engizilip jatqan qarjy reformalary 1 200-ge jýyq jetekshi ǵalymnyń jalaqysyn 70%-ke, ıaǵnı 152 myń teńgeden 257 myń teńgege deıin ulǵaıtýǵa múmkindik beredi. Bul sharalar 74 ǵylymı-zertteý ınstıtýttyń kadrlyq jáne ǵylymı áleýetin, otandyq ǵalymdardyń quzyretin nyǵaıtýǵa yqpal etedi.

«Mınıstrlik zertteýshi ǵalymdarǵa qajetti jaǵdaı jasaýǵa erekshe kóńil bóledi. Vedomstvo ǵalym mamandyǵynyń qarjylyq turǵydan tartymdy bolýy jáne mańyzdy ǵylymı ıdeıalardyń turaqtylyǵy men júzege asyrylýyna kepildik berý úshin júıeli jumys júrgizip jatyr. Memleket basshysynyń tapsyrmasyn oryndaý aıasynda irgeli ǵylym men zertteý ınstıtýttaryn bazalyq qarjylandyrý kólemin ulǵaıtý máselesi sheshildi. Ǵylym týraly zańnamaǵa tıisti ózgerister engizildi», - dep atap ótti Saıasat Nurbek.

Aıta ketsek, qazirgi ýaqytta mınıstrlik 2023-2025 jyldarǵa arnalǵan ǵylymı jáne ǵylymı-tehnıkalyq jobalar boıynsha granttyq qarjylandyrýǵa, onyń ishinde jas ǵalymdarǵa arnalǵan konkýrstar jarııalady.